Qazaqstannyń altyn-valıýta qory artty - Ulttyq bank
NUR-SULTAN. QazAqparat - QR Ulttyq bank tóraǵasynyń orynbasary Aqyljan Baımaǵambetov elimizdiń altyn-valıýta qory týraly aıtty, dep habarlaıdy QazAqparat tilshisi.
«Aldyn ala málimetter boıynsha, Ulttyq banktiń altyn-valıýta rezervteri 2020 jyldyń qańtarynda 1,2 paıyzǵa, ıaǵnı 29,3 mlrd AQSh dollaryna deıin artty. Negizinen, ol altynǵa baılanysty operatsııanyń júrgizilýi men onyń qunynyń artýy nátıjesinde múmkin boldy. Aldyn ala málimetke qaraǵanda, Ulttyq qordyń aktıvteri bir aıda 1 paıyzǵa tómendep, 61,1 mlrd dollardy qurady. Buǵan respýblıkalyq bıýdjetke kepildendirilgen transfertti bólý sebep boldy», - dedi Baımaǵambetov Úkimet otyrysynda.
Onyń sózine qaraǵanda, 1 aqpandaǵy jaǵdaı boıynsha jalpy halyqaralyq rezervter 90,4 mlrd AQSh dollaryn qamtydy.
Budan bólek UB ókili Qazaqstan halqynyń depozıtteri týraly aıtyp berdi.
«2019 jylǵy jeltoqsan aıynyń sońynda depozıt kólemi 19 trln teńgeni qurady. Ulttyq valıýtadaǵy salymdar 4,1 paıyzǵa, shetel valıýtasynda 3,9 paıyzǵa ósti. Nátıjesinde, depozıtterdiń dollarlanýy byltyrǵy jeltoqsan aıynda 43,1 paıyzǵa deıin tómendedi», - dedi Baımaǵambetov.
Osy oraıda, ol teńgedegi salymdar boıynsha stavkalar óziniń tartymdylyǵyn saqtap turǵanyn atap ótti.
