Qazaqstannyń altyn valıýta qory 100 mlrd. dollarǵa jetip qaldy
ASTANA. QazAqparat - Jaqyn arada Qazaqstannyń altyn valıýtalyq qory 100 mlrd. dollarǵa jetedi. Bul týraly búgin Ortalyq kommýnıkatsııalyq qyzmetindegi brıfıngte QR Ulttyq bankiniń tóraǵasy Qaırat Kelimbetov málim etti.
«Taıaý ýaqytta Ulttyq bank pen Ulttyq qordyń jıyntyq qory 100 mlrd. dollarǵa deıin ósedi dep boljap otyrmyz»,-dep atap ótti UB basshysy.
«Bıylǵy qańtar-naýryzda Ulttyq banktiń altyn valıýta qory 7,5 paıyzǵa artyp, búginde 26,5 mlrd. dollardy qurap otyr. 2013 jyly Ulttyq banktiń altyn valıýta aktıvteriniń kólemi 12,7 paıyzǵa deıin, ıaǵnı 24,7 mlrd. dollarǵa tómendedi. Buǵan teńge baǵamyn qoldaýǵa valıýtany shyǵyndaý sebep boldy»,- dedi Q. Kelimbetov.
Ótken jyly Ulttyq qordyń aktıvteri sheteldik valıýtada 20 paıyzdan astam kórsetkishke artyp, 70,5 mıllıard dollarǵa deıin jetti. 2014 jyldyń qańtar-naýryzynda taǵy úsh paıyzǵa ósim bolyp, 72,8 mıllıard dollarǵa deıin artty.
