Qazaqstannyń alty startapy Ońtústik Azııa naryǵyna joldama aldy
ASTANA. QazAqparat - Búgin Astanada "Smart Zholy" baǵdarlamasynyń úzdik alty jobasy tanystyryldy. Atalǵan startaptar maýsym aıynda Sıngapýrda ótetin Echelon Asia Summit-ne joldama aldy. Sol jerde álemniń úzdik 100 jobasy kórsetiledi, dep xabarlaıdy QazAqparat tilshisi.
Aıta ketken jón, Qazaqstandaǵy alty jobany Sıngapýrdyń venchýrlyq ınvestorlardan turatyn arnaıy qazylar alqasy tańdady. Jalpy, "Smart Zholy" baǵdarlamasyna ınnovatorlardyń 100-ge jýyq komandasy qatysýǵa nıet bildirgen.
Ótken jyly Astana, Almaty, Qaraǵandy men Pavlodar qamtyldy. Al fınalǵa jetken 10 komanda Sıngapýrda tájirıbe jınap qaıtty. Bıyl baǵdarlama aıasyndaǵy sharalar respýblıka boıynsha ótti.
Startaptardy qurý jáne damytý boıynsha uıymdastyrylǵan trenıngterge myńnan astam adam qatysty. Al fınalǵa jetken 20 komanda Astana xaby negizinde arnaıy mentorlyq baǵdarlamadan ótti. Olarǵa sıngapýrlyq mamandar jetekshilik etti. 20 komandanyń ishinen 6 úzdik startap irikteldi. Atalǵan jobalar Echelon Asia Summit-inde ınvestorlardy taýyp, Ońtústik Azııanyń naryǵyna shyǵa alady.
Sonymen, alty komandanyń ishinde "Game of Drones" - Abylaıxan Jaqanov, Dáribaı Amanjol men Ebenbaı Erdos, "Nommi" - Alena Tkachenko men Nazym Ysqaqova, "Okauto" - Shaıxıslam Álı Asylxanuly, Damır Omarov, Álimjan Ábýov pen Aıan Eńbekbaı, "AILabs" - Ánýar Sharafýdınov, Baǵdat Myrzaxmetov pen Rústem Taqxanov, "Neupusti" - Farangıza Shýkasheva, Dııar Shyrymbek pen Dına Muqasheva, "KazMotors" - Damır Tokýbaev, Ádil Nursan, Ábdiqalı Qorabaev pen Qýandyq Nurpeıisov bar. Atalǵan jobalar avtomobıl júrgizýshilerine arnalǵan qyzmetter, jasandy ıntellekt salasyndaǵy baǵdarlamalar, bilim berý, kıbersport pen týrızmdi qamtıdy.
QR Aqparat jáne kommýnıkatsııalar mınıstri Dáýren Abaev arnaıy kelip, jeńimpazdardy quttyqtady.
"Barlyqtaryńyz jaqsy bilesizder, búginde Qazaqstanda aqparattyq texnologııalardy damytý sharalaryna erekshe kóńil bólinip keledi. "Tsıfrlyq Qazaqstan" atty arnaıy memlekettik baǵdarlama da qabyldandy. Ony qabyldaý ońaı bolǵan joq. Sebebi barlyq memlekettik organdardyń vızasy qajet. Bir jarym jyl boıy biz atalǵan qujatty talqyladyq. Sodan baryp, bárimiz maquldadyq. Atalǵan baǵdarlama iske asatyn bolsa, Qazaqstan múldem jańa deńgeıge kóteriledi. Dál osy jerde otyrǵan jastar "Smart Zholy" sııaqty jobalar arqyly tájirıbe jınap, sol baǵdarlamany iske asyratyn bolady. Ol úshin barlyq jaǵdaılar jasalǵan", - dep atap ótti D.Abaev.
