Qazaqstannyń alty oblysyndaǵy úı-jaılardyń 40-50 paıyzynda eshbir mal joq - Á.Darınov

ASTANA. QazAqparat - Qazaqstannyń alty oblysyndaǵy úı-jaılardyń 40-50 paıyzynda eshbir mal joq. Bul týraly búgin QR Aýyl sharýashylyǵy mınıstrliginde ótken jıynda Qazaqstan fermerler odaǵynyń basshysy Áýezhan Darınov málim etti.

«Biz taldaý ótkizip, tańqalarlyq qorytyndyǵa keldik: Qazaqstannyń alty oblysyndaǵy úı-jaılardyń 40-50 paıyzynda eshbir mal joq! Osy faktiniń ózi sheneýnikterdiń kózqarasyn ózgertýi tıis. Elimizdiń aýyl sharýashylyǵy salasynyń áleýmettik-agrarlyq saıasatyn qysqa merzimde ári túpkilikti qaıta qaraý kerek», - dedi Á.Darınov.

Sonymen qatar, ol aýyl turǵyndarynyń qalaǵa aǵylýyna alańdaýshylyq tanytyp, bul úderistiń qala ınfraqurylymyna, ıaǵnı bıýdjetine aýyrtpalyq túsiretindigin, al aýyldardaǵy kadr máselesin kúrdelendiretindigin basa aıtty.

«Problemanyń túp tórkini aýyldaǵy ómir súrý deńgeıiniń tómendiginde, tabystyń azdyǵynda bolyp otyr», - dedi ol.