Qazaqstannyń alǵashqy sport telearnasy óz jumysyn bastaıdy
ASTANA. 21 mamyr. QazAqparat - Aǵymdaǵy jyldyń 1 shildesinen bastap birinshi otandyq «KAZSPORT» sporttyq telearnasy óz jumysyn bastaıdy, dep habarlaıdy QR Prezıdenti janyndaǵy Ortalyq kommýnıkatsııalar qyzmetiniń resmı saıty.
«1 shilde kúni qazaqstandyqtar keń aýqymdy habar taratatyn Qazaqstandaǵy alǵashqy sport arnasynyń jumysyna óz baǵalaryn bere alady», - dep habarlady «Qazmedıa ortalyǵynyń» saıty.
«KAZSPORT» telearnasy baıraqty básekelerden habarlar beretin bolady: chempıonattar men respýblıka kýboktaryn, halyqaralyq týrnırlerdi, túrli matchtardy, jarys oryndarynan qyzyqty habarlardy, jeńimpazdarmen, jeńilis tapqandarmen, uıymdastyrýshylarmen suhbattardy, dańqty sportshylardyń qatysýymen sıýjetterdi kórsetedi.
«Qazmedıa ortalyǵy» «Qazaqstan» ulttyq telearnasymen birlesip, 15 maýsymnan bastap testilik rejımde habar taratýdy josparlap otyr.
