Qazaqstannyń alǵashqy shańǵy ekspedıtsııasy Soltústik Polıýske attanbaq (FOTO)

ASTANA. QazAqparat - 2015 jyldyń sáýirinde Qazaq geografııalyq qoǵamy Jerdiń Soltústik Polıýsine alǵashqy qazaqstandyq shańǵy ekspedıtsııasyn bastamaq.

Saıahat Barneodan - Soltústik Polıýske deıin bolady dep josparlanýda. Ol Qazaqstan halqy Assambleıasynyń jyly aıasynda ótkizilýde. Búgin Astanada arnaıy ótkizilgen baspasóz máslıhatynda belgili bolǵanyndaı, qatysýshylar Soltústik Polıýske QR Memlekettik Týy men Qazaqstan halqy Assambleıasynyń jyly degen baıraǵyn, sondaı-aq BUU Qaýipsizdik keńesiniń músheligine ótý jónindegi Qazaqstan usynysynyń sımvolıkalyq týyn tikpek.

«Ekspedıtsııa shetelderde Nursultan Nazarbaevtyń beıbitshilik jáne kelisim saıasaty jáne ıadrolyq qarýǵa qarsy kúreske qosyp otyrǵan úlesin nasıhattaý úshin attanady. Dúnıe júziniń ǵylymı, mádenı jáne gýmanıtarlyq keńistikterinde Qazaqstan Respýblıkasyn dáriptep, sonymen qosa, Qazaqstannyń halyqaralyq jaqsartý - basty maqsattarynyń biri», - deıdi Qazaqstan halqy Assambleıasynyń Tóraǵasynyń birinshi orynbasary Eraly Toǵjanov.

Onyń aıtýynsha, top 31 naýryzǵa deıin qyzý daıyndyq jasap, Almatydan Máskeýge, Máskeýden - Norvegııanyń Oslo qalasyna, odan ári Longıırge attanady. 3 sáýirge deıin saıahattaýshylar ekspedıtsııanyń daıyndyǵyn synap, bazalyq lagerde jattyǵyp, shatyr quryp, jabdyq saımandardy tekseredi. Al 4 sáýirde Longıırden Barneo muzdy aerodromyna ushyp baryp, sol jerden Soltústik Polıýske deıingi shańǵy ekspedıtsııasyn bastaıdy.

Barneodan Polıýske deıin araqashyqtyq shamamen 200 shaqyrymdy quraıdy. Sapar 7-12 kúnge deıin sozylady dep mejelenýde. Jol barysynda ekspedıtsııa qatysýshylary muzdyń jarylǵan jerlerimen, muz shoǵyrlarynan, al muzdaqtardyń arasymen ótkende arnaıy kıimmen jáne ekspedıtsııalyq polıar shanalarymen júzip ótpek.

Jobanyń ǵylymı-gýmanıtarlyq bóliginde genetıkalyq zertteýler jasalady dep kútilýde.