Qazaqstannyń álemdik iri munaı óndirýshilerdiń ondyǵyna enýi magıstraldyq qubyrlardyń mańyzdylyǵyn arttyra túsedi

Bul týraly búgin Májiliste «Magıstraldyq qubyr týraly» jáne «Qazaqstan Respýblıkasynyń keıbir zańnamalyq aktilerine magıstraldyq qubyr máseleleri boıynsha ózgerister men tolyqtyrýlar engizý týraly» zań jobalarynyń tusaýkeseri barysynda málim boldy.

Munaı jáne gaz mınıstrliginiń jaýapty hatshysy Qanatbek Safınovtyń aıtýynsha, atalǵan qujatta magıstraldyq qubyrlardy qaıta qurý arqyly olarǵa memlekettiń basym quqyqtaryn bekitý kózdeledi. Sonymen qatar, magıstraldyq qubyr salasyndaǵy qyzmet kórsetetin nemese onyń qyzmetin paıdalanatyn tulǵalardyń mindeti men quqyqtaryn anyqtaý qarastyrylady. Budan bólek osy salada ulttyq operator ınstıtýtyn engizý máselesi de kózdeledi.  

«Elimizde óndiriletin kómirsýtekti shıkizattardyń aıtarlyqtaı úlesi magıstraldyq qubyrlar arqyly ishki jáne syrtqy naryqqa shyǵady. Sondyqtan da, bul strategııalyq mańyzǵa ıe bolyp otyr. Álemdik iri munaı óndirýshilerdiń ondyǵyna Qazaqstannyń enýine baılanysty magıstraldyq qubyrlardyń róli de arta túsedi. Sondaı-aq, magıstraldyq qubyrlar arqyly munaı tasymaldaý el bıýdjetiniń túsimin aıtarlyqtaı arttyratyny belgili. Shyndyǵynda, bul memleket júrgizetin kópvektorly saıasatpen tikeleı baılanysty ekonomıkanyń birinshi damyǵan salasy. Áıtse de osyndaı mańyzdylyǵyna qaramastan, magıstraldyq qubyrlar máselelerine baılanysty zańdyq qatynastardy retteıtin naqty zańnamalyq aktiler joq. Árıne, osy salada qatynastardy qozǵaıtyn keıbir zańdarda jekelegen normalar bar. Alaıda, olar tıimdi quqyqtyq retteýdi qamtamasyz ete almaıdy», - deıdi jaýapty hatshy.

Onyń aıtýynsha, qazirgi zańnamada magıstraldyq qubyrlar salasyn memlekettik retteý men basqarýǵa Úkimet pen ókiletti organdar arasyndaǵy ýákilettilik tolyq qamtylmaǵan.   Al jańa zań jobasy osyndaı olqylyqtardyń ornyn toltyrýǵa baǵyttalady.