Qazaqstannyń álemdik ekonomıkalyq reıtıngteri jaqsaryp keledi
ASTANA. 22 shilde. QazAqparat - Ulttyq ekonomıkanyń básekege qabilettiligin jaqsartý maqsatynda Qazaqstan óziniń makroekonomıkalyq ortasyn jaqsartý jumystaryn júrgizýde.
Menedjmentti damytý halyqaralyq ınstıtýtynyń (IMD, Shveıtsarııa) aǵymdaǵy jyldyń mamyr aıynda jarııalanǵan «Álemdik básekege qabilettilik boıynsha sholý - 2012» reıtınginde Qazaqstan 4 orynǵa kóterilip otyr, dep habarlady pm.kz saıty.
«Dúnıejúzilik banktiń Bıznes júrgizý boıynsha reıtınginde Qazaqstan TMD-nyń barlyq elinen ozyp, 47-shi orynǵa kóterildi», - dep atap kórsetti Elbasy N.Nazarbaev 2011 jyly jeltoqsandaǵy Qazaqstan Respýblıkasy Táýelsizdiginiń 20 jyldyǵyna arnalǵan saltanatty jınalysta sóılegen sózinde.
Al «The Global Competitiveness Report 2011-2012» esebinde keltirilgen Dúnıejúzilik ekonomıkalyq forýmnyń reıtınginde Qazaqstan «Makroekonomıkalyq turaqtylyq» faktory boıynsha jaǵdaıyn jaqsartyp, álemniń 142 eliniń ishinen 26-shy orynnan 18-shi orynǵa kóterildi jáne Ortalyqazııalyq óńirinde makroekonomıkalyq turaqtylyq boıynsha kóshbasshy atandy.
QR Ekonomıkalyq damý jáne saýda mınıstrliginiń aqparaty boıynsha, «Álemdik básekege qabilettilik boıynsha sholý - 2012» qorytyndysy boıynsha álemniń 59 eli salystyrylǵan Menedjmentti damytý halyqaralyq ınstıtýtynyń reıtınginde Qazaqstan byltyrǵy kórsetkishin tórt baǵamǵa jaqsartyp, 32-shi orynǵa kóterildi.
Qazaqstandaǵy makroekonomıkalyq jaǵdaıdyń jaılylyǵyna elimizdiń negizgi makroekonomıkalyq kórsetkishteri aıǵaq.
Ekonomıka ornyqty ósýi úshin, QR Úkimeti Elbasynyń tapsyrmasyna sáıkes 2011-2015 jyldary ekonomıkanyń 7 paıyz ósimin qamtamasyz etý jónindegi áleýmettik-ekonomıkalyq saıasattyń negizgi baǵyttaryn maquldady. Statıstıka agenttiginiń málimetine súıensek, aǵymdaǵy jyldyń І jartyjyldyǵynda jalpy ishki ónimniń ósimi 5,6 paıyzdy qurady.
Ulttyq jınaqtar deńgeıi sııaqty kórsetkish boıynsha Qazaqstannyń jaǵdaıy turaqty. Dúnıejúzilik ekonomıkalyq forýmnyń reıtınginde Qazaqstan ulttyq jınaq kórsetkishi boıynsha myǵym otyr, álemniń 142 eliniń ishinde 12 orynda tur.
Vedomstvonyń aqparaty boıynsha, Qazaqstandaǵy jınaq normasy 2011 jyly jalpy ishki ónimniń 30 paıyzyn shamalady jáne osy kórsetkish Qazaqstanǵa TMD-nyń birqatar elderiniń jáne basqa da damýshy ekonomıkalardyń arasynda kóshbasshy atanýǵa múmkindik berdi.
Makroekonomıkalyq turaqtylyqty mazmundaıtyn taǵy bir kórsetkish halyqaralyq rezervter bolyp tabylady. Aǵymdaǵy jyldyń maýsym aıynda Qazaqstannyń taza halyqaralyq rezervteri 32,3 mlrd. AQSh dollaryn qurady, al jalpy rezerv somasy 86,3 mlrd. dollarǵa jetip otyr.
Taǵy bir faktor ınflıatsııa deńgeıi - 2012 jyldyń maýsymynda elimizde 5,9 paıyzdy qurady, bul byltyrǵy jyldyń sáıkes kezeńindegi kórsetkishten 3,4 paıyz baǵamǵa tómen. El Úkimeti men Ulttyq bank ınflıatsııa deńgeıin 6-8 paıyz dálizinde ustaý jónindegi antıınflıatsııalyq sharalar qabyldaýda.
Ulttyq ekonomıkanyń básekege qabilettiligin qamtamasyz etý - Qazaqstan Respýblıkasyn damytýdyń 2020 jylǵa deıingi strategııalyq josparynyń basty mindetteriniń biri. Jaıly makroekonomıkalyq turaqtylyq básekege qabilettiliktiń negizgi sharty bolyp tabylady. Al ornyqty ekonomıka óz kezeginde, qazaqstandyq qoǵamdy áleýmettik jańǵyrtýdyń negizin qalaıdy.
