Qazaqstannyń álem elderine sapaly astyq eksporttaýyna zor múmkindikteri bar - E. Aman
áýirdiń 1-i. QazAqparat /Qanat Mámetqazyuly/ - Qazaqstannyń álem elderine sapaly astyq eksporttaýyna zor múmkindikteri bar.
Búgin elordada ótip jatqan Halyqaralyq astyq konferentsııasy barysynda QR Aýyl sharýashylyǵy mınıstrliginiń Jaýapty hatshysy Evgenıı Aman osylaı málim etti, dep habarlaıdy QazAqparat.
«Álemdik qaýymdastyqtyń Qara teńizdik astyq beldeýi áleýetine úlken senimmen qaraıtyny sózsiz. Bul astyq beldeýiniń negizgi ókilderiniń biri Qazaqstan - astyq eksporty boıynsha álemdegi alǵashqy ondyqqa kirse, un eksportynan birinshi orynda tur. Sarapshylar ǵalamdyq qarjy daǵdarysy kezeńinde astyq saýdasynyń álemdik deńgeıdegi belsendiligi tómendeıtinin aıtyp, boljamdar jasaýda. Bunyń ózi qazaqstandyq astyq eksportynyń qýatyn saqtap qalý úshin syndarly ári tıimdi sheshimderdi, saýatty marketıngtik qadamdardy talap etetini sózsiz», dedi E. Aman.
Onyń aıtýnysha, konferentsııanyń negizgi maqsaty TMD elderi aýmaǵynda astyq naryǵy boıynsha ózara baılanysty nyǵaıtý, qazaqstandyq astyqtyń álemdik naryqqa shyǵý joldaryn pysyqtaı túsý, Azııa elderi men parsy shyǵanaǵy boıynsha eksporttyq naryq perspektıvalaryn aıqyndaý, sondaı-aq Keden odaǵynyń qazaqstandyq astyq naryǵy men eksporttyq áleýetine áserin baǵalaý bolyp tabylady.
«Qazaqstannyń sapaly astyq eksporty boıynsha zor múmkindikteri bar. Bul maqsatta shyǵyndardy azaıtý, astyq daqyldary túrlerin óndirýdi keńeıtý boıynsha memleket tarapynan qomaqty qoldaý jasalýda. Qazaqstannyń teńiz porttarynan qashyqta ornalasqany belgili, sondyqtan da astyq eksportynyń ınfraqurylymy, ony tutyný ornyna jetkizý sharalary problemalyq másele bolyp tabylady. Osy baǵytta qazaqstandyq astyqtardy Qytaı, Ońtústik-shyǵys Azııa, parsy shyǵanaǵy elderine jetkizý máseleleri qarystyrylyp jatyr. Osy maqsatta tuńǵysh ret kóliktik-tasymaldaý shyǵyndaryn tómendetýge arnalǵan qarajat kózdelip otyr», dedi E. Aman.
