Qazaqstannyń aldaǵy Qysqy Olımpıadaǵa daıyndyǵy talqylandy
Osyǵan oraı 2018 jyly Phenchhandaǵy Olımpıada oıyndaryna ulttyq qurama komandalardyń daıyndyǵy Qazaqstan Respýblıkasy Ulttyq Olımpıadalyq komıteti (QR UOK) men Qazaqstan Respýblıkasy Mádenıet jáne sport mınıstrliginiń birlesken otyrysynda talqylandy. Bul týraly QR UOK baspasóz ortalyǵy habarlaıdy.
Ulttyq qurama komandalardyń jattyqtyrýshylarynyń qatysýymen bolǵan jıynǵa QR UOK prezıdenti Tımýr Qulybaev pen QR Mádenıet jáne sport mınıstri Arystanbek Muhamedıulynyń tóraǵalyǵymen ótti.
Ońtústik Koreıada ótetin Olımpıada oıyndaryna 90 elden sportshylar men resmı tulǵalar qatysady dep josparlanýda. 15 sport túrinen 102 medal jıyntyǵy sarapqa salynady. Qazaqstannyń sporttyq delegatsııasy toǵyz sport túrinen synǵa túspek. Bas bapkerler men memlekettik jattyqtyrýshylar ulttyq komandalardyń daıyndyqtary týraly baıandap, qazirgi tańda basty maqsat - Olımpıada oıyndaryna joldama alý jáne daıyndyqtyń sońǵy kezeńin oıdaǵydaı ótkizý kerektigin aıtty.
QR Mádenıet jáne sport mınıstrligi sport jáne deneshynyqtyrý isteri komıtetiniń tóraǵasy Elsııar Qanaǵatovtyń aıtýynsha 62 sportshy olımpıadalyq joldamadan úmitti. 2017/2018 jylǵy maýsymda halyqaralyq irikteý jarystarynda lıtsenzııa alý jalǵasady.
Kún tártibindegi basty másele - ulttyq qurama komandalardyń sapaly daıyndyǵy boldy. Bapkerler komandalardy materıaldy-tehnıkalyq qamtamasyz etý boıynsha máseleler joq ekenin aıtyp, memleket tarapynan jasalyp jatqan qoldaýdy joǵary baǵalady. Búginde short-trek, frıstaıl, mánerlep syrǵanaý, shańǵymen tuǵyrdan sekirý, bıatlon, shańǵy jarysynan ulttyq qurama komandalar Olımpıadaǵa qazaqstandyq bapkerlermen qatar quramaǵa shaqyrylǵan sheteldik mamandarmen jattyǵyp jatyr.
QR UOK prezıdenti Tımýr Qulybaev Olımpıada oıyndaryna daıyndyq kezinde ulttyq qurama komandalardyń ǵylymı-keshendi toptarynyń mańyzdylyǵyn atap ótti. Osy oraıda ǵylymı-keshendi toptarǵa qosymsha qarjy bólý qaralýda.
QR UOK prezıdentiniń sózine qaraǵanda, sport týraly zańǵa engizilgen ózgertýler men tolyqtyrýlarǵa baılanysty ulttyq sporttyq federatsııalardyń mártebesi ósip, jaýapkershiligi arta túsken.
Talqy barysynda «Ulttyq qurama komandalardyń daıyndyǵyna Ulttyq Olımpıadalyq komıteti jetekshilik etetin bolady. Eger de bizde áli «uıyqtap júrgen» federatsııalar bolsa, onda olardy «oıatyp» kóreıik. Eger odan nátıje bolmasa, basshylyǵyn aýystyraıyq. Óıtkeni bizge tek sportty biletin adamdar ǵana emes, sonymen qatar onyń damytýǵa kómektesetin azamattar kerek», dedi Tımýr Qulybaev.
Sondaı-aq, QR UOK árqashan dıalogqa daıyn ekenin jáne ulttyq qurama komandalardyń daıyndyǵyna qatysty máselelerdi sheshýge qolǵabys etetindigin jetkizdi.
