Qazaqstannyń aqyly joldary qansha qarjy tabady
ASTANA. QazAqparat - 2020 jylǵa qaraı Qazaqstannyń aqyly joldarynan túsetin kiris kólemi belgili boldy. Ony búgin Úkimet úıinde ótken baspasóz máslıhatynda QR Investıtsııalar jáne damý mınıstrligi Avtomobıl joldary komıtetiniń tóraǵasy Mereke Pishembaev aıtty, dep habarlaıdy QazAqparat.
Onyń sózine qaraǵanda, aǵymdaǵy jyly Astana-Temirtaý, Almaty-Qapshaǵaı jáne Almaty-Qorǵas ýchaskelerinde aqyly jol júıesin qurý jumystary bastalǵan. Onyń josparlanǵan jyldyq túsimi 4 mlrd teńgeni quraıtyn bolady.
«2020 jylǵa qaraı aqyly joldan túsetin jıntyq túsim 30 mlrd teńgege jetedi», - dedi Mereke Pishembaev.
Komıtet basshysynyń dereginshe, bıyl Qaraǵandyny aınalyp ótetin joldy qosqanda Ortalyq-Ońtústik jobasynyń Temirtaý-Qaraǵandy ýchaskesinde qurylys jalǵasýda. Sonymen qatar Ortalyq-Shyǵys jobasy boıynsha Astana-Pavlodar-Semeı-Qalbataý jáne Beıneý-Aqtaý, Aqtóbe-Atyraý, Qapshaǵaı-Taldyqorǵan, Astana-Petropavl, Oral-Kamenka ýchaskelerindegi jalpy uzyndyǵy 1,2 myń shaqyrym bolatyn ýchaskede jumystar júrgizilýde.
Buǵan qosa, bıýdjet qarajaty esebinen uzyndyǵy 511 shaqyrym bolatyn Beıneý-Aqjigit, Şýche-Zerendi, Taskesken-Baqty, Úsharal-Dostyq, Qostanaı-Denısovka sııaqty 6 jobany iske asyrý qolǵa alynǵan.
«2018-2019 jyldary respýblıkalyq mańyzy bar 6,2 shaqyrym avtojoldardy ortasha jóndeýden ótkizý úshin 4,4 myń shaqyrymdy qaıta jańǵyrtý jáne 800 shaqyrym jolǵa kúrdeli jóndeý jumystaryn júrgizý josparlanyp otyr», - dedi ol
Onyń aıtýynsha, 2018 jyly Ortalyq-Shyǵys dáliziniń Astana-Pavlodar, Temirtaý-Qaraǵandy ýchaskelerin, Saratovqa shyǵatyn Oral-Kamenka avtojolyn jáne Taskesken-baqty ýchaskesin aıaqtaý josparlanǵan.
