Qazaqstannyń AQSh pen Reseıdegi konsýldyqtary telegram-bot ashty

NUR-SULTAN. QazAqparat - AQSh pen Reseıdegi Qazaqstannyń konsýldyqtary telegram-bot ashty. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Qazaqstannyń AQSh-taǵy jáne Reseı Federatsııasyndaǵy elshilikteri konsýldyq bólimniń jumysy men qyzmetteri týraly negizgi suraqtarǵa jaýap berýge arnalǵan telegram-bottardy iske qosqanyn habarlaımyz. Telegram-bot túsindirý sıpatynda, ıaǵnı konsýldyq qyzmetter týraly negizgi aqparatty qamtıdy. Onda mátindi taný algorıtmi qarastyrylǵan. Bul rette bot kómegimen ótinishti qaraý kezeńin baqylap otyrýǵa bolady», - dedi resmı ókil.

Onyń aıtýynsha, qoldanýshy usynylǵan jaýaptardaǵy pýnktteriniń birin tańdaý qajet. Budan ári paıdalanýshy qajetti jaýaptar boıynsha ári qaraı jyljyp otyrady. Onyń qyzmetterin paıdalaný úshin telegramnyń tirkelgen paıdalanýshysy bolý kerek.

«Bottar únemi jetildirilip otyrady jáne tek sizderdiń kómekterińiz arqyly naǵyz ınteraktıvti kómekshige aınalatyn bolady. Ony belsendi paıdalanýǵa shaqyramyz. Bot jumysy boıynsha óz usynystaryńyz ben eskertýlerińizdi tikeleı chat nemese konsýldyqtardyń elektrondyq mekenjaılaryna jiberýge bolady»,- dedi Aıbek Smadııarov.

Foto: QR SІM