Qazaqstannyń aqparattyq tehnologııalary zaman aǵymyna saı damýy tıis - Premer-Mınıstr
ASTANA. Qyrkúıektiń 17-ci. QazAqparat /Qanat Mámetqazyuly/ - Qazaqstannyń aqparattyq tehnologııalary zaman aǵymyna saı damýy tıis. Búgin elordada ótken Qazaqstan ІT-kompanııalarynyń ІІ-sezi barysynda QR Premer-Mınıstri Kárim Másimov osylaı málim etti.
«Meniń oıymsha, aldaǵy 5-7 jyldyń ishinde bizdiń ústelimizdiń ústindegi barlyq temirler qoqysqa tastalady. Búkil álemde temir shyǵaratyn zaýyttardyń barlyǵy qaıta beıindeledi. Óıtkeni, biz búgingi kúni jańa ótpeli kezeńdegi tehnıkalyq revolıýtsııa aldynda turmyz. Qazirgi tańda jańadan paıdaǵa asyp jatqan «i-Pad» sekildi basqa da qolymyzǵa túsken planshetterdiń bári aqparattyq tehnologııalardyń qurylymyn túbirimen ózgertedi», dedi K. Másimov.
Sonymen qatar, Premer-Mınıstr jıynǵa qatysýshylarǵa zamanǵa saı tehnologııalardy baǵalaı bilý qajettigin aıtyp, olardan Úkimet pen mınıstrlik tıisti usynystar kútetinin jetkizdi. «Óıtkeni, búgin taýar óndirýshilerge keremet jaǵdaılar jasaǵanymyzben, eger olar álemdik ózgerister týdyryp jatqan zaman aǵymyna sáıkes bolmasa, onda biz óz ónimimizben bir orynda tabjylmaı qala berýimiz ábden múmkin», dedi K. Másimov.
Sonymen birge, Úkimet basshysy ásirese aqparattyq tehnologııalar salasynda qazirgi zaman aǵymyna saı damýdan kesh qalýǵa bolmaıtynyn aıtyp, óndirisshilerdi jańashyldyqqa umtylýǵa úndedi.
«Men ómirimde alǵash ret kompıýterdi kórgenim esimde, ol frantsýzdardyń «PDP-11» dep atalatyn tehnıkasy bolatyn. Osynyń ózi tehnıka ǵalamaty sekildi kórinýshi edi. Al qazirgi qaltada júretin uıaly telefonnyń ózi qýaty jaǵynan, ámbebaptyǵy jaǵynan bárin basyp ozady. Taıaýdaǵy birneshe jyldarda bizdi aqparattyq tehnologııalardyń jáne bir tóńkerisi kútip tur dep oılaımyn», dedi K. Másimov.
Úkimet basshysy aldaǵy ýaqytta jańa tehnologııalar týdyratyn, sol salany ıgerýge umtylatyn qazaqstandyq kompanııalarǵa qoldaý bolatynyn da jetkizdi.
