Qazaqstannyń aqparattyq tehnologııalar naryǵy kólemi 2009 jyly 90 mıllıardqa jýyq teńgeni qurady - Baqytjan Bıtemirov
ALMATY. Naýryzdyń 19-y. QazAqparat /Erlik Erjanuly/ - Qazaqstannyń aqparattyq tehnologııalar naryǵynyń kólemi byltyr 97 -den 90 mıllıard teńgege deıin tómendedi. Bul búgin Almatyda ótip jatqan «Software Engineering Summit-2010 Qazaqstan» forýmynda aıtyldy,
dep habarlaıdy QazAqparat.
Indýstrııa jáne jańa tehnologııalar mınıstrliginiń Damýshy salalar departamentiniń joǵary tehnologııa salasy basqarmasynyń bastyǵy Baqytjan Bıtemirovtiń aıtýynsha, oǵan ekonomıkalyq belsendiliktiń tómendeýi óz yqpalyn tıgizdi. Baǵdarlamalyq qamtamasyz etý men aqparatyq tehnologııalyq qyzmet shyǵyndarynda kompıýterlik qural-jabdyqtardyń úlesi birshama. Máselen kompıýterlik qural-jabdyqtar shyǵyny aqparattyq tehnologııalar qyzmeti shyǵynynan 5 ese joǵary. Eger ony naqtylaıtyn bolsaq kompıýterlik qural-jabdyqtar shyǵyny 69 mıllıard teńgeni qurasa, aqparattyq tehnologııalar qyzmetiniń shyǵyny 14 mıllıard teńgeni qurap otyr.
«Aqparattyq tehnologııalar shyǵyndarynyń jalpy kóleminiń 75 paıyzdan astamy aqparatyq tehnologııalyq qural-jabdyqtardy óndirý men taratý sektorynyń úlesine tıedi. Ol qazaqstandyq qoǵamdy aqparattandyrý úrdisi kompıýter, jelilik jáne perıferııalyq kompıýterlik qural-jabdyqtarǵa suranystyń ósýine áser etýde. Sektordyń basty ereksheligi onyń ımportqa táýeldiligi bolyp otyr», deıdi B. Bıtemirov. Onyń sózine qaraǵanda, baǵdarlamalyq qamtamasyz etý naryǵyndaǵy otandyq kompanııalardyń úlesi 5 paıyzǵa da jetpeıdi. Byltyr bul naryqtyń kólemi 7 mıllıard teńge bolyp, 2008 jylmen salystyrǵanda 18 paıyzǵa tómen boldy. Al 14 mıllıard teńgeni quraǵan aqparattyq tehnologııalyq qyzmet naryǵy aldyńǵy jylmen salystyrǵanda 2 paıyzǵa tómendegen.
