Qazaqstannyń aqparattyq tehnologııa naryǵy Maıkrosoftyń jańa ónimderimen tolyqty
ALMATY. Qarashanyń 18-i. QazAqparat /Erlik Erjanuly/ - Maıkrosoft kompanııasy naryqqa ónimderin shyǵardy.
Bul týraly búgin Almatyda ótken «Tıimdilik ózara árekettesýde» dep atalatyn konferentsııada aıtyldy, dep habarlaıdy QazAqparat.
Qazaqstannyń aqparattyq tehnologııa naryǵyndaǵy jańa ónimder - derbes kompıýterge arnalǵan Windows® 7 operatsııalyq júıesiniń jańa nusqasy. Habarlamalar almasý men birlesken jumysty uıymdastyrýǵa arnalǵan Exchange Server 2010 sheshimi. Sondaı-aq serverlik operatsııalyq júıeniń Windows Server 2008 R2 nusqasy.
«Jańa ónimderdiń paıda bolýy aqparattyq tehnologııalar mamandarynyń kúnnen kúnge ulǵaıyp otyratyn qajettilikterimen alǵysharttanady. Kompıýterdi paıdalanýshylardyń saýattylyǵy artqan saıyn, olarǵa qoıylatyn talaptar da ulǵaıady. Qazirgi zaman adamy tek keńsede ǵana emes, kez-kelgen jerde jumys isteý múmkindikterin qajet etedi. Soǵan sáıkes qajettilikter artqan saıyn AT-qyzmetteriniń de mindetteri kúrdelene túsedi. Búgingi kúni olardyń aldynda kompıýterdi paıdalanýshylarǵa barynsha úlken múmkindikter usynýdan bólek shyǵyndardy azaıtyp, qaýipsizdikti barynsha qamtamasyz etý mindeti qala beredi. Bul jańa ónimder AT-uıymdaryna atalǵan mindetterdi barynsha ıgerýge jáne sonyń nátıjesinde olardy básekege qabiletti etip, damýdyń jańa kezeńderine aıaq basýǵa kómektesedi», deıdi Maıkrosoftyń Ortalyq jáne Shyǵys Eýropa aımaǵy boıynsha basqarýshy dırektory ıAka Stele.
