Qazaqstannyń agrarlyq sektory úshin organıkalyq ónim salasynyń keleshegi zor

ASTANA. QazAqparat - Qazaqstannyń agrarlyq sektory úshin organıkalyq ónim salasynyń keleshegi zor. Bul týraly búgin Parlament Senatynda «EAEO jáne DSU jaǵdaıynda otandyq agrarlyq sektordyń básekege qabilettiligin arttyrý - zańnamalyq retteý jáne is júzine asyrý» atty parlamenttik tyńdaý barysynda Senat spıkeri Qasym-Jomart Toqaev osylaı málim etti.

«Otandyq agrarlyq sektor úshin keleshegi bar baǵyttardyń qatarynda organıkalyq óndiris salasyn ataýǵa bolady. Bul baǵytty damytý aýyl shalýashylyǵynyń túsimin joǵary deńgeıge kótere alady. Qazir búkil álemde ekologııalyq taza ónimge suranys jyl saıyn orta eseppen 20-30 paıyzǵa artyp otyr», - dedi Senat spıkeri.
Sonymen qatar, Q. Toqaev Qazaqstannyń agrarlyq saladaǵy geografııalyq artyqshylyqtaryn paıdalaný asa mańyzdy ekenin atap ótti.
«Qazaqstan taǵam ónimderine suranys únemi artyp otyratyn Qytaı, Reseı, Orta jáne Taıaý Shyǵys pen Eýropa sııaqty negizgi naryqtardyń ortasynda ornalasqan. Sonymen birge, búgingi kúni Eýrazııalyq ekonomıkalyq odaq naryǵy - keleshegi zor naryqtardyń biri.
Reseı jekelegen elderden azyq-túlik ákelýge tyıym salǵannan keıin, Qazaqstannyń agrarlyq sektory úshin reseılik naryqta óz pozıtsııasyn nyǵaıtýǵa qosymsha múmkindikter paıda boldy. Osy oraıda aǵymdaǵy jyly jalpy et eksporttaýdy 60 myń tonnaǵa jetkizý týraly Prezıdenttiń tapsyrmasynyń nemese Úkimettiń Qytaıǵa jyl saıyn 3 mln. tonna astyq satý jónindegi ýádesiniń oryndalýy jóninde oryndy saýal paıda bolyp otyr», - dedi Senat spıkeri.