Qazaqstannyń 9 óńirinde kezekshi synypta oqıtyn oqýshylar koronavırýs juqtyrdy
Bul týraly QR DSM Taýarlar men kórsetiletin qyzmetterdiń sapasyn jáne qaýipsizdigin baqylaý komıtetiniń resmı ókili Erjan Baıtanaev aıtty, dep habarlaıdy QazAqparat tilshisi.
«Biz oqýshylar arasyndaǵy syrqattaný máselesin kún saıyn baqylaýda ustap kelemiz. Oqý jyly bastalǵaly beri oqýshylar arasynda koronavırýs ınfektsııasynyń 825 jaǵdaıy tirkeldi. Onyń ishinde kezekshi synyptarda oqıtyn balalar sany - 261. Bul oflaın rejımde bilim alýshylardyń jalpy sanynyń 0,03 paıyzyn quraıdy. Al onlaın formatta bilim alatyn balalardyń KVI indetine shaldyǵýy 564 oqýshy boldy. Bul 0,02 paıyzǵa teń», - dedi ol Ortalyq kommýnıkatsııalar qyzmetindegi baspasóz máslıhatynda.
Resmı ókildiń dereginshe, sońǵy aptada 9 óńirde kezekshi synypta oqıtyn oqýshylar arasynda 62 jaǵdaı tirkeldi.
«Balalar arasynda aýrýǵa shaldyqqandar kóp óńirlerdiń qatarynda Shyǵys Qazaqstan 32, Pavlodar 12, Batys Qazaqstan 5 bar. Al qalǵan 4 óńirde aýrýdyń birli-jarym jaǵdaıy tirkeldi. Atap aıtqanda, Qaraǵandy, Aqmola oblystary men Nur-Sultan qalasynda - 3 jaǵdaı, Soltústik Qazaqstan men Atyraý oblystarynda - 1 jaǵdaı», - dedi Erjan Baıtanaev.