Qazaqstannyń 9 óńirinde áskerı oqý-jattyǵý ótýde

NUR-SULTAN. QazAqparat - 7 oblys pen respýblıkalyq mańyzy bar eki qala aýmaǵynda «Batyl toıtarys – 2022» strategııalyq komandalyq-shtabtyq oqý-jattyǵý ótip jatyr. Bul týraly QazAqparat Qorǵanys mınıstrligine silteme jasap habarlaıdy.

Bul oqý-jattyǵý bıylǵy jyldyń 16 sáýirine deıin jalǵasady.

Qarýly kúshterdiń, Ulttyq qaýipsizdik komıtetiniń, Іshki ister mınıstrliginiń, Tótenshe jaǵdaılar mınıstrliginiń jáne jergilikti atqarýshy organdardyń daǵdarysty jaǵdaıdy beıtaraptandyrý jónindegi birlesken is-qımyldary pysyqtaldy.

Óńirlerde áskerı bólimsheler jaýyngerlik tehnıkamen belgilengen aýdandarǵa marsh jasap, onda josparlanǵan tapsyrmalardy oryndaıdy. Atap aıtsaq, bular terrorızmge qarsy operatsııalardy júrgizý, memlekettik shekarany qorǵaýdy kúsheıtý, qoǵamdyq qaýipsizdikti qamtamasyz etý, bosqyndar lagerlerin ashý.

Odan ózge de, Qarýly kúshterdiń quramalary men bólimderi polıgondarda túrli jaýyngerlik is-qımylda, onyń ishinde arnaıy operatsııa barysynda oqý-jaýyngerlik mindetterdi pysyqtaıtyn bolady.

«Batyl toıtarys – 2022» vedomstvoaralyq keshendi strategııalyq komandalyq-shtabtyq oqý-jattyǵýy Aqtóbe, Almaty, Atyraý, Jambyl, Qyzylorda, Mańǵystaý, Túrkistan oblystarynyń, sondaı-aq Almaty jáne Shymkent qalalarynyń aýmaǵynda ótip jatyr.

Sharaǵa Qarýly kúshterdiń, basqa da áskerler men áskerı quralymdardyń quramalary men bólimderi, ortalyq memlekettik jáne jergilikti atqarýshy organdary jumyldyrylǵan.