Qazaqstannyń 9 óńirinde 39 jańa sý qoımasy salynady
NUR-SULTAN. QazAqparat - Qazaqstannyń 9 óńirinde 39 jańa sý qoımasy salynady. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.
«Agroónerkásiptik keshendi damytý jónindegi 2017-2021 jyldarǵa arnalǵan memlekettik baǵdarlamada 41 avarııalyq sý qoımasyn qalpyna keltirý kózdelgen. Onyń ishinde 2017-2019 jyldar kezeńinde 10 nysan paıdalanýǵa berildi. Al ekeýi osy jyly aıaqtalatyn bolady. 2021 jyly taǵy 8 nysandy aıaqtaý josparlanýda jáne qalǵan jıyrma 21 nysan 2025 jylǵa deıin iske asyrylady. Budan basqa, 9 óńirde jalpy kólemi jylyna 3,6 mlrd tekshe metr bolatyn 39 jańa sý qoımasyn salý josparlanǵan. Olardy iske asyrý úshin 115 mlrd teńge qajet», - dedi ol Senat tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Onyń dereginshe, sý qoımalaryn salý 70 eldi meken úshin sý tasqyny qubylystarynyń qaýpin azaıtýǵa, 394 myń gektar jańa sýarmaly jerlerdi aınalymǵa engizýge jáne aýyl sharýashylyǵynda 129 myńnan astam jumys ornyn qurýǵa jaǵdaı jasaıdy. Sonymen qatar transshekaralyq ózenderdiń sý kólemine táýeldilikti alyp tastaýǵa múmkindik beredi.
«Atap aıtsaq, Qyrǵyzstannan 30 paıyzǵa deıin, Ózbekstannan 25 paıyzǵa deıin, al Reseıden 15 paıyzǵa deıin táýeldilikti aryltady», - dedi Maǵzum Myrzaǵalıev.
