Qazaqstannyń 8 óńirinde ońaltý ortalyqtary jańartyldy, balalar tegin emdeledi

NUR-SULTAN. QazAqparat – Qazaqstannyń 8 oblysynda ońaltý ortalyqtaryna tolyq jańartý jumystary júrgizildi. Onda aı saıyn 600 bala kvotamen 21 kúndik emdeý kýrsynan óte alady. Bul týraly N. Nazarbaev qorynyń atqarýshy dırektorynyń orynbasary Álkeı Marǵulanuly aıtyp berdi, dep habarlaıdy QazAqparat tilshisi.

Ońaltý ortalyqtary Almaty, Atyraý, Batys Qazaqstan, Shyǵys Qazaqstan, Jambyl, Túrkistan, Qostanaı oblystarynda jáne Nur-Sultanda ashyldy.

«Elbasynyń «Qamqorlyq» bastamasy negizinde 8 oblysta ońaltý ortalyqtary jumystaryn qaıta jańǵyrtyp, tolyqqandy ınfraqurylymdyq jańartý jumystary júrgizildi. Onda jylyna 5 myńǵa jýyq adamdy ońaltý isi qolǵa alynady. Onyń barlyǵy búgingi forýmda aıtyldy. Árbir ortalyqta kvota aıasynda aıyna 600-ge jýyq sal aýryna shaldyqqan balalardy tolyqqandy 21 kúndik baǵdarlamalyq emdeý qolǵa alynady», - dedi Á. Marǵulanuly Elbasynyń qatysýymen ótken «Táýelsizdik jolyn jalǵastyrar urpaq» forýmynda.

Spıkerdiń aıtýynsha, 2021 jyly taǵy 8 ortalyq ashý josparlanǵan.

«Biz «Qamqorlyq» ortalyqtaryn salyp, jóndeýden ótkizip qana qoımaı, 12 memleketten tikeleı zaýyttan tehnologııalardy satyp alyp, 220 mamandy biliktilikti arttyrý kýrstarynan ótkizdik. Elbasy tapsyrmasymen atalǵan jumysty jalǵastyratyn boldyq. Kelesi 2021 jyly óńirlerde atalǵan 8 ortalyqqa taǵy qosymsha 8 ortalyq ashý josparlanǵan», - dedi Álkeı Marǵulanuly.

Aıta keteıik, búgin Qazaqstan óirlerinde Elbasy N. Nazarbaevtyń «El úmiti» bastamasyna qatysqan jastar marapattaldy. «Elbasy medali» jobasynyń qatysýshylaryna qola medaldar, halyqaralyq olımpıada júldegerleri men olardyń jattyqtyrýshylaryna «El maqtanyshy» syılyǵy jáne aýyl oqýshylary arasynda ótken «Myń bala» olımpıadasynyń jeńimpazdaryna syılyqtar tabystaldy.