Qazaqstannyń 8 oblysynda sý tasqynyna qarsy sharalar júrip jatyr
ASTANA. QazAqparat - Aqmola, Almaty, Shyǵys Qazaqstan, Jambyl, Qaraǵandy, Aqtóbe, Qostanaı jáne Soltústik Qazaqstan oblystarynda sý tasqynyna qarsy sharalar jalǵasýda, dep habarlaıdy QR ІІM TJ Komıtetiniń baspasóz qyzmeti.
Respýblıkanyń 8 óńirinde TJ Komıteti bólimsheleriniń, jergilikti atqarý organdarynyń, ulttyq gvardııanyń, jergilikti polıtsııa qyzmetiniń jeke quramynan 1 186 adam, 276 tehnıka, 21 sý sorý qurylǵysy jáne 20 júzý quraly jumyldyryldy.
Aqmola oblysynyń Tselınograd aýdanynda sýdy sorǵytý, sýdyń arǵy betinde qalyp qoıǵan halyqty ótkizý jáne olarǵa azyq-túlik ónimderin jetkizý, qaptardy daıyndaý jumystary jalǵasyn tabýda. Zerendi, Esil jáne Jarqaıyń aýdandarynda táýlik boıy kezekshilik uıymdastyrylǵan. Esil aýdanynyń Znamenka aýylynda jergilikti atqarý organdary halyqqa aýyz sý tasyp jatyr. 
Soltústik Qazaqstan oblysy Qyzyljar aýdanyndaǵy Teplıchnoe, Zarechnoe aýyldarynda jáne Zarechnoe kentinde qutqarýshylar halyqty, azyq-túlik ónimderin, malǵa arnalǵan jemdi tasymaldap jatyr. Medıtsınalyq kómek kórsetý, ınertti materıaly bar qaptar tóseý, bógetterdi nyǵaıtý jáne Esil ózenindegi sý deńgeıin baqylaý jumystary júrgizilýde.
Almaty oblysynda apattyq-qutqarý jumystary, Qyrǵaýyldy ózeniniń arnasyn tazartý, jaǵasyn nyǵaıtý, aǵyp kelgen sý deńgeıin baqylaý jumystary júrip jatyr.
Qostanaı oblysy Qarasý aýdanynyń Jambyl kentinde qutqarýshylar men jergilikti atqarý organdary erigen qar sýyn sorǵytý jáne olardy burý jumystary toqtaǵan joq. Avtojoldarda qalpyna keltirý jumystar júrgizilýde, kezekshilik uıymdastyrylýda.
Qaraǵandy oblysynda jergilikti polıtsııa qyzmeti sý aǵynynan búlingen avtojoldarǵa beketter qoıyp, qoǵamdyq tártipti saqtaýdy uıymdastyrdy.
Aqtóbe oblysynyń jergilikti polıtsııa qyzmeti baqsha ujymdaryn patrýldeý jáne qoǵamdyq tártipti saqtaýdy jalǵastyrýda.
Shyǵys Qazaqstan oblysy Besqaraǵaı aýylynda qutqarýshylar jer asty sýlaryn sorǵytyp jatyr.
Sý tasqyny kezeńi bastalǵannan beri qosymsha 46 958 metr ýaqytsha bóget turǵyzyldy, ınertti materıaly bar 251 919 qap toltyrylyp, tóseldi, 1 597 765,5 tekshe metr sý soryldy.
