Qazaqstannyń 8 boksshysy Azııa chempıonatynyń jartylaı fınalyna shyqty
ASTANA. 6 shilde. QazAqparat - Iordanııanyń Amman qalasynda ótip jatqan Azııa chempıonatynda qazaqstandyq 8 boksshy jartylaı fınalǵa shyqty,
dep habarlady QR Boks federatsııasynyń baspasóz qyzmetinen.
Federatsııanyń aqparatyna qaraǵanda, 5 shilde kúni 6 boksshymyz, atap aıtqanda, Jánibek Álıhanuly, Ádilbek Nııazymbetov, Berik Ábdirahmanov, Danııar Eleýsinov, Temirtas Júsipov, Mereı Aqshalov shırek fınalda judyryqtasyp, qarsylastarynan basym túsken. Al buǵan deıin Anton Pınchýk pen Ivan Dychko jartylaı fınalǵa joldama alǵan edi.
Azııa chempıonatynyń jartylaı fınalynda 13 eldiń bylǵary qolǵap sheberleri sharshy alańǵa kóteriletin bolady.
Esterińizge sala keteıik, atalǵan baıraqty básekege 27 eldiń 163 boksshysy qatysýda. Chempıonattyń jartylaı fınaly erteń, al fınaly 8 shilde kúni ótedi.
