Qazaqstannyń 8 boksshysy álem chempıonatynyń shırek fınalyna shyqty
ASTANA. QazAqparat - Úndistannyń Gývahatı qalasynda ótip jatqan bokstan jasóspirim qyzdar arasyndaǵy álem chempıonatynyń irikteý jekpe-jekteri aıaqtaldy. Atalǵan baıraqty básekede elimizdiń namysyn qorǵaý úshin 10 bylǵary qolǵap sheberi attanǵan bolatyn, dep habarlaıdy QazAqparat.
Qazaqstan Boks federatsııasy taratqan málimetke sáıkes, irikteý jekpe-jekterinde jasóspirimder arasynda álem chempıony bolǵan Nadejda Rıabets amerıkalyq Chıtlalı Ortızge ese jiberdi. Sondaı-aq Marjan Eseken de polıak qarsylasy Patrıtsıı Borystan utylyp qaldy.
Degenmen shırek fınalǵa 8 qyzymyz shyǵyp otyr. Jazıra Oraqbaeva (48 keli), Jansaıa Ábdiraıymova (51), Laýra Esenkeldi (54), Sandýǵash Ábilhan (57) jáne Jansaıa Baltabekova (60) álem chempıonatynda birneshe kezdesý ótkizip, jeńis tuǵyrynan kórine bildi. Al Saltanat Estaeva (75), Araılym Bekdildá (81) jáne Dına Islambekova jarys joldaryn búgin shırek fınaldan bastaıtyn bolady. Álem chempıonatynyń fınaldyq kezdesýleri 26 qarashada ótedi.
Aıta keterligi, álem chempıonatyna álemniń 38 eliniń 186 qyzy qatysýda. Shırek fınalǵa Úndistan men Reseıden 9-dan boksshy shyqty. Al AQSh-tyń 6, Polshanyń 4 qyzy jarys jolynda. Qytaı, Germanııa, Túrkııa jáne Ýkraınadan 4 qyzdan shırek fınalǵa joldama aldy. Irlandııa men Italııadan úsh sportshydan sharshy alańdaǵy kezdeýlerin jalǵastyrady.
