Qazaqstannyń 7 ózeninde sý tapshylyǵy oryn alýy yqtımal
ASTANA. QazAqparat - Qazaqstannyń 7 ózeninde sý tapshylyǵy oryn alýy yqtımal. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Qorshaǵan orta jáne sý resýrstary vıtse-mınıstri Erlan Nysanbaev málim etti.
«Boljam boıynsha, bolashaqta bizde 8 ózen basseıininiń 7-eýinde sý tapshylyǵy týyndaýy múmkin. Ózderińiz biletindeı, Ertisten basqa ózenderde, atap aıtqanda Jaıyq, Іle, Tobyl, Nura, Sarysý, Esil ózenderinde sý tapshylyǵy oryn alýy yqtımal», - dedi ol.
Bul rette vıtse-mıınstrdiń atap ótýinshe, Elbasy Jarlyǵymen bekitilgen Qazaqstannyń sý resýrstaryn basqarýdyń memlekettik baǵdarlamasynyń basty maqsaty qoldanystaǵy sý shyǵyndaryn qysqartý bolyp otyr.
«Bizde tek aýyl sharýashylyǵynyń ózinde ǵana 60 paıyzdaı sý joǵalady. Al shetelde bul kórsetkish óte tómen. Sol sebepti, osy baǵdarlama aıasynda jańa tehnologııalardy qoldaý arqyly biz bul máseleni sheshýge múmkinshilik alamyz», - dedi E.Nysanbaev.
