Qazaqstannyń 7 óńirinde dızel otynynyń baǵasy tómendetildi

NUR-SULTAN. QazAqparat - Janarmaı quıý stantsııalary monopolııaǵa qarsy vedomstvonyń dızel otynyna baǵany tómendetý jónindegi talaptaryn oryndady. Bul týraly QazAqparat Básekelestikti qorǵaý agenttigine silteme jasap habarlaıdy.

Buǵan deıin mamyr aıynan bastap elimizdiń ońtústiginde dızel otynyna baǵanyń óskeni týraly habarlanǵan bolatyn.

Osy oraıda, Qazaqstan Respýblıkasy Básekelestikti qorǵaý jáne damytý agenttigi júrgizilgen taldaý qorytyndysy boıynsha dızel otyny baǵasynyń ósýi alypsatarlyq sıpatqa ıe ekenin anyqtady.

Osyǵan baılanysty, 19 AJQS-qa dızel otynyna baǵany tómendetý arqyly sóz baılasý belgilerin joıý qajettiligi týraly habarlama jiberildi.

Habarlamany oryndaý merzimi ony alǵan kúnnen bastap kúntizbelik 30 kúndi quraıdy. Habarlamany oryndamaý monopolııaǵa qarsy tergeý júrgizýge negiz bolady.

Bul habarlamalardy naryq sýbektileriniń kópshiligi merziminen buryn oryndady jáne baǵany tómendetýge daıyn ekendikterin habarlady.

Nur-Sultan, Almaty, Shymkent qalalary men Qyzylorda, Jambyl, Túrkistan, Almaty oblystarynda ár lıtr baǵasy 2-den 5 teńgege deıin tómendetildi.

Sonymen qatar, osy jyldyń 1 shildesinen bastap dızel otynyna aktsız baǵasy tonnasyna 540 teńgeden 9 myń 300 teńgege deıin kóterilgenin atap ótý qajet, bul faktor keıin baǵaǵa áser etýi múmkin.

Baǵalyq sóz baılasýǵa jáne JJM baǵasynyń negizsiz ósýine jol bermeý máselesi Agenttiktiń turaqty baqylaýynda.