Qazaqstannyń 7 mınıstrligi «Salamatty Qazaqstan» baǵdarlamasy aıasynda sektoraralyq kelisimge qol qoıdy

Halyq densaýlyǵyn saqtap, nyǵaıtýdy kózdeıtin «Salamatty Qazaqstan» memlekettik baǵdarlamasyn birlesip júzege asyrý týraly Kelisimge Densaýlyq saqtaý mınıstri Salıdat Qaıyrbekova, Bilim jáne ǵylym mınıstri Baqytjan Jumaǵulov, Baılanys jáne aqparat mınıstri Asqar Jumaǵalıev, Eńbek jáne halyqty áleýmettik qorǵaý mınıstri Gúlshara Ábdihalyqova, Tótenshe jaǵdaılar mınıstri Vladımır Bojko, Іshki ister vıtse-mınıstri Amantaı Quranbekov jáne Týrızm jáne sport mınıstrligi Sport komıtetiniń tóraǵasy Elsııar Qanaǵatov qol qoıdy.

S.Qaıyrbekova atap kórsetkendeı, Memlekettik baǵdarlama bul tek bir ǵana vedomstvoǵa júktelgen qujat emes. Ol - qoǵam densaýlyǵyn qorǵaý máseleleri boıynsha barlyq sektorlardy tarta otyryp biryńǵaı ulttyq saıasatty ázirleýdi kózdeıtin baǵdarlama. Onymen birge, shylym shegý, durys tamaqtanbaý syndy faktorlar aldynda medıtsınalyqtan góri, medıtsınalyq emes salalar qaýqarly.

«Baǵdarlamany birneshe baǵyt boıynsha júzege asyrý kózdelip otyr. Olardyń arasynda aýrýdyń aldyn alý, sanıtarlyq- epıdemıologııalyq qyzmetti jaqsartý, dári-dármekterge qol jetimdilik pen olardyń sapasyn arttyrý, ınnovatsııa máseleleri men medıtsınalyq bilim berýdi jetildirý bar. Densaýlyq saqtaý mınıstrligi bul jumysqa tek memlekettik organdardy ǵana emes, sondaı-aq, úkimettik emes uıymdardy da belsendi tartatyn bolady», - dep atap ótti mınıstr.

Óz kezeginde V.Bojko, «Salamatty Qazaqstan» baǵdarlamasyn jumyla júzege asyrý nátıjesinde 2013 jylǵa qaraı jol-kólik apattarynda ólim-jitim sany 10 paıyzǵa, 2015 jylǵa qaraı 14 paıyzǵa azaıatyndyǵyn aıtty. Sol sııaqty jol apattarynda jaraqattanýdy 2013 jylǵa deıin - 8, al 2015 jylǵa deıin - 10 paıyzǵa azaıtý kózdelip otyr. Al shuǵyl apattyq-medıtsınalyq kómek kórsetý aımaǵyndaǵy avtojoldarda mertigý 2013 jylǵa deıin - 23, al 2015-ke qaraı 16 paıyzǵa azaıatyn bolady.

Al Bilim mınıstri B.Jumaǵulov, mektep jasyndaǵy balalardyń densaýlyǵyna, olardyń tamaqtanýy men sportpen shuǵyldanýyna, ártúrli túıitkilderge psıhologııalyq turǵyda tótep berý ımmýnıtetteriniń qalyptasýyna basa nazar aýdarý qajet dep sanaıtyndyǵyn bildirdi.