Qazaqstannyń 69 qalasynda káriz-tazartý qurylysyn salý kerek - Qaıyrbek Óskenbaev

NUR-SULTAN. QazAqparat - Álıhan Smaıylov káriz-tazartý qurylystaryn (KTQ) salý jáne jańǵyrtý jobalaryn iske asyrý jáne memlekettik qala qurylysy kadastrynyń derekterin tsıfrlandyrý máseleleri jóninde keńes ótkizdi, dep habarlaıdy primeminister.kz.

Birinshi másele boıynsha sóz sóılegen ındýstrııa jáne ınfraqurylymdyq damý mınıstri Qaıyrbek Óskenbaev búgingi tańda Qazaqstannyń 69 qalasynda KTQ salý nemese rekonstrýktsııalaý qajet ekenin atap ótti.

Tıisti jobalardy respýblıkalyq bıýdjet pen halyqaralyq uıymdardyń qarajaty esebinen qarjylandyrý josparlanyp otyr.

Qazirgi tańda tórt qalada (Atyraý, Qyzylorda, Fort-Shevchenko jáne Shymkent) KTQ salý nemese rekonstrýktsııalaý jobalary júzege asyryla bastady.

Qalǵan 65 jobany ınvestıtsııalyq tartymdylyqty eskere otyryp, 2028 jylǵa deıin iske asyrý usynylady.

Ekinshi másele boıynsha Memleket basshysynyń tapsyrmasyna sáıkes «Memlekettik qala qurylysy kadastry» AAJ-da ınjenerlik jeliler týraly derekterdi tolyq tsıfrlandyrýdy qamtamasyz etý josparda bar ekeni atap ótildi.

Jerasty jelileri boıynsha naqty keńistiktik derekterdi tek ınjenerlik-geodezııalyq izdenister ádisimen ǵana qalyptastyrý múmkin bolady.

Sonymen qatar derekterdi úzdiksiz ózektendirý tetigin engizbesten, ınjenerlik jelilerdi tolyq tsıfrlandyrǵan orynsyz.

Osy maqsatta tabıǵı monopolııalar sýbektileriniń ınjenerlik jelilerdiń tehnıkalyq sıpattamalary men bos qýaty týraly málimetterdi mindetti túrde usynýy boıynsha zańnamaǵa túzetýler engizýge, sondaı-aq «MQK» AAJ-ǵa engize otyryp, barlyq deńgeıdegi jobalardyń biryńǵaı qala qurylysy saraptamasyn engizýge bastama jasaldy.

Atalǵan sharalardyń arqasynda ınjenerlik jelilerdiń tsıfrlyq negizi qalyptastyrylýy tıis, ol aǵymdaǵy túgendeý jumystary men derekterdi onlaın-ózektendirý aıasynda naqtylanady.

QR Premer-Mınıstri talqylanǵan jobalarǵa qatysty aıtylǵan tásilderdi maquldap, olardy iske asyrý úshin pysyqtaý jumysryn júrgizýdi tapsyrdy.