Qazaqstannyń 6 azamaty Arab Ámirlikterinde jazasyn ótep jatyr
NUR-SULTAN. QazAqparat – Májiliste «Qazaqstan Respýblıkasy men Birikken Arab Ámirlikteri arasyndaǵy sottalǵan adamdardy berý shartyn ratıfıkatsııalaý týraly» zań jobasy qaraldy, dep habarlaıdy QazAqparat.
QR Bas prokýrorynyń orynbasary Bolat Dembaevtyń aıtýynsha, Birikken Arab Ámirlikterinde Qazaqstannyń alty azamaty – bes er adam jáne bir áıel jazasyn ótep jatyr.
«Qazaqstannyń alty azamatynyń beseýi bir qylmystyq is boıynsha qamalǵan. Olar top qurý, abaısyzda kisi óltirý jáne tonaý boıynsha 15 jylǵa bas bostandyǵynan aıyrylǵan. Áıelge kelsek, ol esirtki satqany úshin, shamamen bes keli psıhotroptyq zattar satqany úshin ómir boıy bas bostandyǵynan aıyrylǵan», - dedi B. Dembaev Májilistiń jalpy otyrysynda.
Onyń aıtýynsha, Qazaqstanda sottalǵan BAÁ azamattary joq. Osylaısha, elder arasynda ýaǵdalastyq ornasa, sottalǵandar jazasyn Qazaqstanda óteı alady.
«Arab Ámirlikterindegi jaza bizdiń sot taǵaıyndaǵan jazaǵa tolyq sáıkes kelýi kerek. Eger bizde ólim jazasy nemese ómir boıy bas bostandyǵynan aıyrý qarastyrylmaǵan bolsa, onda biz sottalýshyny jazasyn óteý úshin qabyldaı almaımyz», - dep túsindirdi B. Dembaev.
