Qazaqstannyń 56 memlekettik organy ákimshilik jaza engizý quqyǵyna ıe - R. Muqashev
ASTANA. 25 qarasha. QazAqparat - Qazaqstannyń ákimshilik jaza engizýge quqyly memlekettik organdar sany 56-ǵa jetip otyr. Bul týraly búgin Astanada jańa redaktsııadaǵy Ákimshilik quqyq buzýshylyq týraly kodekstiń tanystyrlymy barysynda Májilistiń Zańnama jáne sot-quqyqtyq reforma komıtetiniń tóraǵasy Raqmet Muqashev málim etti.
Komıtet tóraǵasynyń aıtýynsha, ákimshilik zańnamany reformalaý negizinen osy baǵyttaǵy normatıvtik zańnamalardy jetildirýge baılanysty bolyp tabylady. Toqtala ketetin jaıt, qoldanystaǵy Ákimshilik quqyq buzýshylyq týraly kodeks 2001 jyly qabyldanǵan bolatyn. Zaman aǵymyna saı osy zańnamanyń basym bóligi ózgertýlerdi qajet etetini aıqyn. «Qoldanystaǵy Ákimshilik quqyq buzýshylyq týraly kodekstiń qabyldanǵanyna 12 jyl ótti. Al osy 2001 jyldan beri qaraı kodekske shamamen 600-ge tarta ózgerister men tolyqtyrýlar engizilgen»», - deıdi R. Muqashev. Onyń aıtýynsha, búgingi kúni ákimshilik jaza sharasyn qoldana alatyn sýbektiler sany 56 memlekettik organǵa deıin jetken. Sondyqtan da, komıtet basshysy osy baǵyttaǵy zańnamany retteýdiń qajettigin alǵa tartady.
«Jańa Ákimshilik quqyq buzýshylyq kodeksti ázirleýdiń ózi memlekettiń azamat pen memlekettik organdar jáne olardyń jaýapty tulǵalary arasyndaǵy problemalardy retteýge mán berip otyrǵanyn kórsetedi. Budan bólek, jalpy alǵanda jańa kodeks tutastaı qoǵamnyń adam quqyqtaryn qorǵaý tetikterin jaqsartý tetigine umtylysyn bildiredi», - deıdi ol.
