Qazaqstannyń 500 azamaty shetelde lańkester lagerinde júr - Din mınıstrligi

ASTANA. QazAqparat - Din isteri jáne azamattyq qoǵam mınıstri Nurlan Ermekbaev terrorıstik jáne basqa da asa aýyr qylmys úshin azamattyqtan aıyrý boıynsha zańǵa engizilgen ózgeristerge qatysty pikirin bildirdi, dep habarlaıdy QazAqparat vedomstvonyń baspasóz qyzmetine silteme jasap.

Mınıstr Elbasy N. Nazarbaev «QR keıbir zańnamalyq  aktilerine olardy QR Konstıtýtsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» Zańǵa ýaqytyly qol qoıǵanyn atap ótti. Oǵan sáıkes, budan-bylaı terrorıstik jáne basqa da asa aýyr qylmys jasaǵan qazaqstandyqtar azamattyǵynan aırylatyn bolady.

Búginde shetelde lańkester lagerinde Qazaqstannyń 500 azamaty bar. 

N.Ermekbaevtiń atap ótýinshe, qazirgi tańda sırııa-ırak aımaǵynda terrorıstik toptar úshin jaǵdaıdyń qıyndap jatqanyn bilemiz. Qylmyskerler sheginý joldaryn, sonyń ishinde ózderiniń burynǵy turǵan jerlerine qaıtý múkindikterin izdestirýde. Alaıda, bul olardyń qylmystyq pıǵyldarynan bas tartqanyn bildirmeıdi.

Sondyqtan, qazaqstandyqtardyń ishinen shyqqan osyndaı adamdar qylmystyq tájirıbe jınaqtap, elimizge aram nıet-oımen oralýy múmkin. Osyǵan oraı, jańa tolyqtyrýlarda azamattyqtan aıyrý múmkindigi qarastyrylýda».

«Másele terrorızm aktilerin, terrorıstik toptardy qurý jáne basqarý, onyń qyzmetine qatysý, sondaı-aq  respýblıkamyzdyń ulttyq jáne ómirlik mańyzy bar múddelerine asa aýyr zııan keltirý týraly bolyp otyr. Sot istiń mán-jaıyn, jasaǵan áreketiniń aýyrlyǵyn, keltirgen zardaptaryn tolyq zerdeleý negizinde erekshe jaǵdaılarda ǵana azamattyǵynan aıyrady» - dep naqtylady ol. 

Mınıstr týǵan jerin tastap, shetelge terrorıstik qurylymdarǵa qatysýǵa ketken adamdar Otanyna opasyzdyq jasaǵandarǵa teńeletinin qadap aıtty.