Qazaqstannyń 5 óńirinde órt boldy

NUR-SULTAN. QazAqparat – Qazaqstannyń 5 óńirinde órt boldy. Órt bolǵan aımaqtardaǵy jaǵdaı týraly QR Tótenshe jaǵdaılar mınıstrliginiń baspasóz qyzmeti habar taratty, dep habarlaıdy QazAqparat.

Aqtóbe oblysynyń Áıteke bı aýdanynda, saǵat 10:20-da T.Júrgenov aýylynan 42 km qashyqtyqta qurǵaq shóp janyp, jalyn 500 gektar jerdi sharpydy. Órt sondaı-aq bıdaı alqabyna órship, shamamen 700 gektar jer janyp ketti. Qazirgi tańda egis alqabyna tónip turǵan qaýip joq. Órtten zardap shekkender joq, órttiń shyǵý sebebi anyqtalýda.

Túrkistan oblysynyń Otyrar aýdanynda saǵat 13:40-ta Sheńgeldi aýylynan 5 km jerde, «Túrkistan-Syrdarııa» óńirlik tabıǵı parkiniń Túrkistan fılıalynyń aýmaǵynda 10 gektar aýmaqta qurǵaq shóp órtendi. Órt oqshaýlandy.

Qaraǵandy oblysynyń Osakarov aýdanynda saǵat 14:19-da Kollektıvnoe aýylynan 10 km qashyqtyqta Qaraǵandy orman jáne janýarlar álemin qorǵaý sharýashylyǵynyń aýmaǵynda shaǵyn ormandar men qurǵaq shóp janyp, aldyn ala málimetter boıynsha 60 gektar jer órtengen.

Shyǵys Qazaqstan oblysynyń Altaı aýdanynda saǵat 15:12-de Zyrıanov orman sharýashylyǵynyń aýmaǵynda qurǵaq shóp tutanyp, Novo-Polıakov jáne Katon-Qaraǵaı aýdandarynyń taýly aımaqtaryna jaıylǵan. Saǵat 21:00-de órtengen aýmaqtyń kólemi 167 gektar boldy.

Qazirgi tańda eldi mekenderge qaýip tónip turǵan joq, órt áli sóndirilip jatyr.

Aqmola oblysynyń Zerendi aýdanynda saǵat 20:38-de «Kókshetaý» ulttyq parkine qarasty Grıbnov orman sharýashylyǵynan órt shyqty. Órttiń biraz bóligi, sóndirildi, bul jumystar áli júrip jatyr.

Jel kúsheıgen saıyn órtti sóndirý qıyndaı túsýde, alaıda jaǵdaı baqylaýda.