Qazaqstannyń 5 myń mektebinde jóndeý jumystary júrgizilýde

dep habarlady Bilim jáne ǵylym mınıstrliginiń baspasóz qyzmetinen pm.kz saıtyna.

«5474 mektepte jalpy somasy 4,7 mlrd. teńgeniń aǵymdaǵy jóndeý jumystary júrgizilýde. Búgingi tańda mektepterdiń 43,6 paıyzynda jóndeý jumystary jasalyp bitti», - delingen vedomstvo habarlamasynda.

Oǵan qosa, 617 mektepte jalpy somasy 19,1 mlrd. teńgeniń, onyń ishinde jylý júıeleri men qazandyqtardy jóndeý, sondaı-aq santehnıkalyq, elektromontajdyq jáne ishki qurylys jumystary júrgizilýde. Búginde mektepterdiń 38 paıyzynda kúrdeli jóndeý jumystary aıaqtaldy.

Jańa 2012-2013 oqý jylynyń basyndaǵy jaǵdaı boıynsha 211 bilim oshaǵy apatty jaǵdaıda dep tanyldy. Osy problemany sheshý úshin elimizde jańa 90 bilim oshaǵy salynýda, 7 mektepte kúrdeli jóndeý jumystary júrgizilýde.

Vedomstvonyń aqparaty boıynsha, ІІ jartyjyldyqta Oral qalasynda «Nazarbaev Zııatkerlik mektebiniń», sondaı-aq óńirlerde  shaǵyn quramda mektepterge arnalǵan 28 resýrstyq ortalyqtyń ashylýy josparlanyp otyr. Al qarasha aıynda Astanada 800 orynǵa arnalǵan kásiptik lıtseıdiń qurylysy, jyldyń sońynda úsh aýysymda jumys isteıtin jáne apatty jaǵdaıdaǵy mektepterdiń ornyna salynyp jatqan 27 mekteptiń qurylystary aıaqtalady.

Oǵan qosa, mektepterdi jylý berý maýsymyna daıyndaý jumystary jalǵasýda. Elimizdegi 7449 mekteptiń 1374-i - ortalyq jylý jelisine qosylǵan bolsa, 6075 mektep avtonomııalyq jylý kózin tutynady.

Bul sharalar bilim oshaqtaryn jańa oqý jylyna daıyndaýdyń aıasynda júrgizilýde jáne Qazaqstannyń bilim berý salasyn qurylymdyq jańartýǵa baǵyttalýda.

Qazaqstanda barlyǵy 7449 jalpy bilim beretin mektep jumys isteıdi jáne olarda 2 461 245 oqýshy bilim alady. Jańa oqý jylynda 255 023 baldyrǵan mektep tabaldyryǵyn alǵash ret attaıdy.