Qazaqstannyń 43 ǵalymy klımattyń ózgerýi zertteýlerimen aınalysady
ASTANA. QazAqparat - QR Parlamenti Senatynyń jalpy otyrysynda palata depýtattary «Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (ıÝNESKO) arasyndaǵy Qazaqstan Respýblıkasynda ıÝNESKO aıasynda Ortalyq Azııa óńirlik glıatsıologııalyq ortalyǵyn (2-sanat) qurý týraly kelisimdi ratıfıkatsııalaý týraly» zań jobasyn qabyldady, dep habarlaıdy QazAqparat.
Aıta keteıik, bul kelisim 2012 jylǵy 29 mamyrda Astanada jasalǵan.
Qujattyń maqsaty Qazaqstanda Ortalyq Azııa óńirlik glıatsıologııalyq ortalyǵyn qurý bolyp tabylady. Ortalyqty qurý glıatsıologııalyq ǵylymdy damytýǵa jáne óńirlik jáne jahandyq dengeıde klımattyń ózgerýiniń muzdyqtarǵa, qar jamylǵysyna jáne sý resýrstaryna áserleriniń ǵylymı túsinigin jaqsartýǵa, glıatsıologııa, taý krıosferalary, gıdrologııa jáne klımatologııa problemalary jónindegi zertteýlerdi damytýǵa, sý jáne azyq-túlik qaýipsizdigi problemalaryn sheshýge yqpal etetin bolady.
Ortalyq tıisti uıymdar arasyndaǵy ǵylymı-zertteý qyzmetin jáne aqparat almasýdy jáne úılestirýdi kelisimge sáıkes nyǵaıtýǵa, klımattyń ózgerýi salasyndaǵy ǵylymı zertteýlerdi júzege asyrýǵa, óńirlik ǵylymı-zertteý baǵdarlamalaryn ázirleýdi kótermeleýge, júrgizilgen ǵylymı zertteýlerdiń nátıjelerin teorııalyq jáne praktıkalyq semınarlar, oqý kýrstary, konferentsııalar jáne merzimdi basylymdar arqyly taratýǵa járdemdesedi.
«Qazaqstan ǵalymdary 60 jyldan beri bul salada zertteýler júrgizip otyr. Ortalyq Almaty qalasyndaǵy geografııa ınstıtýtynyń bazasyna ornalasady. Bul ortalyqty qurý arqyly sý qaýipsizdigi, klımattyń ózgerýi boıynsha zertteýler deńgeıin kóterýge jaǵdaı jasalady. Ortalyqta jumys jasaýǵa geografııa ınstıtýtynan 43 adam tańdaldy. Olardyń 50 paıyzy jas mamandar»,-dedi jalpy otyrysta QR Bilim jáne ǵylym mınıstri Erlan Saǵadıev.
