Qazaqstannyń 4 óńirinde patogendik zerthana salynbaq
NUR-SULTAN. QazAqparat – QR Densaýlyq saqtaý mınıstrligi ShQO, Túrkistan, Atyraý oblystary men Nur-Sultan qalasynda ІІ sanattaǵy patogendik zerthana salýdy usynyp otyr. Ol úshin keminde 7,7 mlrd teńge qajet, dep habarlaıdy QazAqparat tilshisi.
Mundaı usynysty «Qazaqstan Respýblıkasynyń bıologııalyq qaýipsizdigi týraly» zań jobasyn Májilis depýtattarynyń aldynda tanystyrǵan QR Densaýlyq saqtaý vıtse-mınıstri – Bas sanıtar dáriger Erlan Qııasov kóterdi.
«Zań jobasy aıasynda qolda bar zerthanalyq bazany qosymsha jaraqtandyrýǵa jáne jetildirýge (5,5 mlrd. teńge), fızıkalyq qorǵanysty jetildirýge (0,4 mlrd. teńge), ımmýndyq-bıologııalyq preparattardy GMP talaptary boıynsha shyǵarý jónindegi ǵımarat salýǵa (7,7 mlrd teńge), sondaı-aq ShQO, Túrkistan, Atyraý oblystarynda jáne Nur-Sultan qalasynda patogendigi II sanattaǵy mıkroorganızmdermen jumysty júzege asyratyn 4 zerthana salýǵa jobalyq-smetalyq qujattama ázirleýge (0,3 mlrd teńge) bıýdjetten 14,4 mlrd teńge jumsaý kózdelgen», - dedi Erlan Qııasov.
Onyń aıtýynsha, bıoqaýipsizdik salasyndaǵy biryńǵaı memlekettik aqparat júıe qurý úshin 200 mln teńge kerek. Al mıkroorganızmder kollektsııasyn ustaýǵa 400 mln teńge bólý usynylyp otyr.
