Qazaqstannyń 4 oblysynda qasqyrdy atýǵa tyıym salynbaq
ASTANA. QazAqparat - Qazaqstannyń dalaly tórt oblysynda, atap aıtqanda Aqmola, Qaraǵandy, Qostanaı, Aqtóbe oblystarynda qasqyrdy atýǵa moratorıı jarııalanady, dep habarlaıdy «QazAqparat» HAA tilshisi.
Bul týraly búgin QR Orman sharýashylyǵy jáne janýarlar dúnıesi Komıteti tóraǵasynyń orynbasary Qaırat Ústemirov habarlady.
«Biz qasqyrlar men sýquzǵyndardyń sanyn retteý máselesin qarastyryp jatyrmyz. Júrgizilgen monıtorıng jumysynyń qorytyndysy qasqyrdardyń sanynyń azaıyp ketkenin kórsetip otyr. Sondyqtan, bıyl Aqmola, Qaraǵandy,Qostanaı, Aqtóbe oblystarynda eki jyl merzimge qasqyrdy atýǵa moratorıı engizýdi kózdep otyrmyz. Dalaly óńirlerde qasqyrlar qatty azaıyp ketti. Júıesiz atý óz zardabyn tıgizip otyr. Sonymen birge, jol talǵamaıtyn qarkeshkish kólikpende qasqyrdy atýǵa tyıym salynady. Óıtkeni keıbireýler qasqyr atamyz dep jol talǵamaıtyn kólikpen shyǵady da, basqa ańdardy aýlap ketip jatady», - deıdi Q.Ústemirov.
Komıtet ókiliniń aıtýynsha, sýquzǵyndar boıynsha Shyǵys Qazaqstan oblysynan kóptegen shaǵymdar kelip túsip jatqan kórinedi. Shaǵymdanýshylar sýquzǵynnyń aǵashtarǵa zardabyn tıgizip, balyqtardy qyryp jatqanyn aıtqan. Sondyqtan sýquzǵyndy rettelip otyratyn qustardyń qataryna engizý josparlanýda.
