Qazaqstannyń 4 oblysynda 8 kásiporynnyń nesıesi kepildendirildi – QR AShM

NUR-SULTAN.QazAqparat - Qazaqstanda ótken jyldyń tamyz aıynan beri agrarlyq saladaǵy ınvestıtsııalyq jobalardy iske asyrýǵa bólinetin ekinshi deńgeıli bank nesıelerin kepildendirý mehanızmi jumys istep keledi.

Aqmola, Batys Qazaqstan, Qostanaı jáne Pavlodar oblystaryndaǵy 8 kásiporynnyń bank nesıeleri kepildendirildi. Onyń jalpy somasy 2,3 mlrd teńgeni qurady. Osy arqyly fermerler ekinshi deńgeıli bankter arqyly nesıe rásimdedi. Nátıjesinde kásiporyndaryn jańartyp, ónimdilikti arttyrýǵa múmkindik aldy, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.

Qazirgi ýaqytta bankterde jalpy somasy 3,8 mlrd teńgeni quraıtyn taǵy 5 joba qaralýda. Oń sheshim qabyldansa Aqtóbe, Shyǵys Qazaqstan, Jambyl, Qostanaı, Soltústik Qazaqstan oblystarynyń kásipkerleri nesıelerin kepildendirý múmkindigine qol jetkizedi. Munda jyl on eki aı jumys isteıtin jylyjaı qurylysyn, astyq keptirý keshenderin, angarlar salý, jańbyrlatyp sýarý jabdyqtaryn satyp alý jáne aınalym qarajatyn tolyqtyrý jobalary usynyldy.

Aýyl sharýashylyǵy mınıstrligi bank nesıelerin kepildendirý mehanızmin salany nesıeleýdi yntalandyrý, bankterdiń nesıe táýekelderin azaıtý jáne agrarlyq salany qarjylandyrýdyń tartymdylyǵyn arttyrý arqyly fermerlerdi qoldaý maqsatynda ázirledi.

Kepildendirý júıesine ekinshi deńgeıli bank nesıelerin alý arqyly ınvestıtsııalyq jobalardy iske asyratyn nemese iske asyrýdy josparlaǵan aýyl sharýashylyǵy taýaryn óndirýshiler – kepilge qoıatyn múlki joq jeke kásipkerlik sýbektiler (AQ, JShS, sharýa jáne fermer qojalyqtary jáne t.b.) qatysa alady.

Bankten alynatyn nesıe Qordan beriletin kepildikke baılanysty bolady. Máselen, nesıe somasy – 5 mıllıard teńgeden aspaýy tıis, nesıe merzimi – 10 jylǵa deıin, jyldyq syıaqy mólsherlemesi – 17%-dan aspaıdy. Aýyl sharýashylyǵy taýaryn óndirýshi kepildendirý qyzmeti úshin nesıe somasynyń 0,1% mólsherinde komıssııa tóleıdi.

Kepildik Agroónerkásip keshenindegi qyzmettiń barlyq túrlerine, sondaı-aq tamaq ónimderin óndirý qyzmetiniń ınvestıtsııalyq jobalaryn iske asyrýǵa beriledi.

Bekitilgen basym ınvestıtsııalyq baǵyttar:

• Taýarly sút fermalary;
• Etti qus sharýashylyǵy;
• Qarqyndyq baq;
• Jylyjaılar;
• Qant qyzylshasyn ósirý jáne qyzylsha qantyn óndirý;
• Jarma óndirisi;
• Jemister men kókónisterdi qaıta óńdeý;
• Ósimdik maıy men maı ónimderin óndirý.

Qor nesıe somasynyń 50%-na deıin kepildendiredi. Basym ınvestıtsııalyq jobalar boıynsha kepildik mólsheri joba iske qosylǵansha 85%-ǵa deıin, iske qosylǵannan keıin nesıe somasynyń 50%-na deıin kepildendiredi.

Agroónerkásip keshenindegi nesıelerdi kepildendirý júıesiniń operatory «Aýyl sharýashylyǵyn qarjylaı qoldaý qory» AQ.