Qazaqstannyń 4 qalasynda jerdi onlaın berý ilki jobasy iske qosylady

NUR-SULTAN. QazAqparat - Qazaqstannyń 4 qalasynda jerdi onlaın berý ilki jobasy iske qosylady. Bul týraly búgin Úkimet otyrysynda «Tsıfrlyq Qazaqstan» memlekettik baǵdarlamasynyń júzege asyrylý barysy jaıynda baıandaǵan QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıev aıtty, dep habarlaıdy QazAqparat tilshisi.

«Elbasy tapsyrmasy boıynsha asa mańyzdy jobalardyń biri - Jer qatynastaryn tsıfrlandyrý. Basty maqsat - jer ýchaskelerin onlaın berý. Qyzmetti kórsetý úshin Biryńǵaı memlekettik kadastr júıesi qurylýda. Atalmysh júıe Jer kadastryn, Jyljymaıtyn múlik regıstrin jáne aımaqtyq geoportaldardy biriktiredi», - dedi ol.

Mınıstrdiń dereginshe, osy jyldyń 1-toqsanynda Nur-Sultan, Almaty, Atyraý, Aqtóbe qalalarynda jerdi onlaın berý ilki jobasy qosylady.

«Degenmen, basqa aımaqtar jumysty jandandyrýy qajet. Aýyl sharýashylyǵy mınıstrligi normatıvtik-quqyqtyq aktilerge ýaqytyly ózgeris engizýi qajet. Asqar Uzaqbaıuly, ákimdikter geoportaldaryn Biryńǵaı memlekettik kadastr júıesimen ıntegratsııalaý kerek. Ákimdikterge 31 jeltoqsanǵa deıin barlyq aımaqtarda jer ýchaskelerin onlaın berý qyzmetin iske qosý tapsyrmasyn berýińizdi suraımyn», - dep júgindi Asqar Jumaǵalıev Úkimet basshysy Asqar Mamınge.