Qazaqstannyń 4 qalasynda balalar organızmindegi qorǵasynǵa qatysty máseleler zertteledi
NUR-SULTAN. QazAqparat – QR Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy BUU Balalar qorymen (ıÝNISEF) birlesip, balalar organızminde qorǵasynǵa qatysty zertteý júrgizbek.
Bul týraly QazAqparat Qoǵamdyq densaýlyq saqtaý ulttyq ortalyǵy baspasóz qyzmetine silteme jasap habarlaıdy.
Qorshaǵan orta búgingi tańda lastanǵan, bul úderis ýaqyt ótken saıyn keri ketip, densaýlyqqa qaýip tóndirip otyr. Bul jaǵdaı ásirese balalardyń densaýlyǵyna keri áserin tıgizip, ónerkásip kásiporyndary ornalasqan aımaqtarda balalardyń densaýlyǵy qorǵasynmen ýlanýda. Zertteý osy máseleni qamtıdy.
«Biz ózimiz júrgizgen saraptaý jumystary qorǵasynnyń balalardyń densaýlyǵyna áserine baılanysty tańdap alynǵan óńirlerdegi epıdemııalyq jaǵdaıdy ishinara bolsa da bilýge múmkindik jasaıdy degen úmittemiz. Biz bolashaqta el kóleminde budan da aýqymdy zertteýler júrgizýdi josparlap otyrmyz. Al osy jolǵy ilki joba nátıjeleri aldyǵa qoıǵan jospar aıasynda búgingiden de tereń zertteýler júrgizýge yqpal etetin birqatar is-sharalardy túzýge múmkindik beredi degen oıdamyz»,-dedi QR DSM Qoǵamdyq densaýlyq saqtaý ulttyq ortalyǵy juqpaly emes aýrýlardyń aldyn alý departamentiniń bas mamany Qýanysh Álimbetov.
Zertteý jumystary Almaty, Qaraǵandy, Nur-Sultan, Shymkent qalalarynda júrgiziledi.
Daıyndalǵan málimetter balalar densaýlyǵyn qorǵasynmen ýlanýdan qorǵaý men baqylaýdyń myqty da turaqty júıesin qalyptastyrý baǵytyndaǵy úlken jobanyń irgetasyn qalaýǵa múmkindik beredi. Qorǵasynnyń yqpalyn joıýǵa bolady.
Zertteý jumystary 2021 jyldyń naýryz aıynyń sońyna deıin júrgiziledi.
BUU Balalar qorynyń (ıÝNISEF) derekteri boıynsha, álemde 800 mıllıonǵa deıin bala qorǵasynnan zardap shegedi. Qorǵasynmen ýlaný balalardyń densaýlyǵyna aýyr zalalyn tıgizedi. Atap aıtqanda olardyń mıynyń damýyna keri áser etip, óziniń qarym-qabiletine degen senimdiligi tómendeıdi, ózine kóńil bólinbeıdi degen kúıde bolady jáne mektepte úlgerimi tómendep, keıinirek ózgelerge degen jekkórýshilik kózqaras qalyptasady.
