Qazaqstannyń 36 kásipornynda lean-tehnologııalar engizilýde
ASTANA. 13 qyrkúıek. QazAqparat - Qazaqstanda 36 otandyq kásiporyn únemdilik óndirisin nemese lean-tehnologııasyn ıgerýde,
dep málim etti Tehnologııalyq damý jónindegi ulttyq agenttiktiń basqarýshy dırektory Gúlnar Esenǵazına pm.kz saıtyna bergen suhbatynda.
«Memlekettik qoldaýdyń bul quraly ındýstrııalyq-ınnovatsııalyq qyzmetti memlekettik qoldaý týraly Zańǵa sáıkes, basymdyqty baǵyttardyń aıasynda aǵymdaǵy jyly ınnovatsııalyq granttardyń jańa 9 túriniń biri retinde usynylatyn bolady», - dedi ol.
QR Úkimetiniń 2012 jylǵy 9 tamyzdaǵy №1035 qaýlysymen bekitilgen «Shet elde ınjenerlik-tehnıkalyq personaldyń biliktiligin arttyrýǵa, joǵary bilikti sheteldik mamandardy tartýǵa, konsaltıngtik, jobalyq jáne ınjınırıngtik uıymdardy tartýǵa, basqarýshylyq jáne óndiristik tehnologııalardy engizýge ınnovatsııalyq granttar berý qaǵıdalarynyń 66 jáne 67-shi tarmaqtaryna sáıkes, basqarýshylyq jáne óndiristik tehnologııalardy engizýge beriletin grant Lean, Kaıdzen tehnologııalaryn da qamtıdy.
«Qazirgi tańda Lean, Kaıdzen sııaqty memlekettik qoldaý quraldaryn paıdalanyp otyrǵan kásiporyndardyń sany 36-ǵa jetti»,- deıdi G.Esenǵazına.
Onyń ishinde, 2009 jyly lean-tehnologııalar - 15 kásiporynda engizilse, 2010 jyly - 13, 2011 jyly - 8 óndiriste engizildi.
Bul tehnologııalar kásiporyndarǵa qomaqty ekonomıkalyq paıda kórýge múmkindik berip otyr. Mysaly, «Qaınar AKB» JShS Kaıdzen júıesiniń arqasynda 208 mln. teńgeden astam taza tabys tapsa, basqarýshylyq tehnologııalardy engizýdiń arqasynda «Munaımash» AQ 47 mln. teńge ekonomıkalyq paıdaǵa qol jetkizip otyr.
Sondaı-aq, zamanaýı basqarýshylyq jáne óndiristik tehnologııalardy engizý jónindegi bıýdjettik baǵdarlamalardy iske asyrýdyń qorytyndysy boıynsha 2010 jyldan beri 2 qazaqstandyq lean-forým ótkizilip, onda Tehnologııalyq damý jónindegi ulttyq agenttik pen halyqaralyq kompanııalardyń arasynda memorandýmdarǵa qol qoıyldyn.
«Memorandýmdardy iske asyrýdyń aıasynda Qazaqstan kásiporyndarynyń 800-ge jýyq mamany lean-tehnologııalar boıynsha taǵlymdamadan ótti. Bul kórsetkish otandyq kásiporyndardyń atalmysh tetikke degen múddeliligin bildiredi», - deıdi agenttiktiń basqarýshy dırektory.
