Qazaqstannyń 3 oblysynda aýa raıynyń qolaısyzdyǵyna baılanysty jol jabyldy
ASTANA. QazAqparat - Qostanaı, Soltústik Qazaqstan, Aqtóbe oblystarynda aýa raıynyń qolaısyzdyǵy saldarynan respýblıkalyq mańyzy bar joldarda kólik qozǵalysyna shekteý engizildi, dep habarlady «Qazavtojol» RMK baspasóz qyzmeti.
Búgin, 24 naýryzda Qostanaı oblysynda saǵat 15.00-de aýa raıynyń nasharlaýyna baılanysty (boran, joldyń kórinbeýi) «Qostanaı-Áýlıekól-Surǵan» (108-232 shaqyrym) avtojolynda, Áýlıekól kentinen Aqmola oblysynyń shekarasyna deıingi ýchaskede júk jáne qoǵamdyq kólikter úshin jol qozǵalysy shekteldi.
Saǵat 18.00-de aýa raıynyń nasharlaýyna baılanysty (boran, joldyń kórinbeýi) «Mamlıýtka-Qostanaı (180-243 shaqyrym), SQO shekarasynan Uzynkól kentine deıin, «Ekaterınbýrg-Almaty» (686-729 shaqyrym), Sarykól kentinen SQO shekarasyna deıingi ýchaskede kóliktiń barlyq túrleri úshin jol jabyldy.
SQO-da saǵat 17.00-de aýa raıynyń nasharlaýyna baılanysty (qar, boran, joldyń kórinbeýi) barlyq baǵyt boıynsha kóliktiń barlyq túrleri úshin jol jabyldy.
Budan basqa, Aqtóbe oblysynda 219 shaqyrymynda jol ústinen eni 50-60 m, bıiktigi 1 m bolatyn qar sýy aǵyp jatýyna baılanysty «Qandyaǵash-Embi-Shalqar-Yrǵyz» avtojolynyń 200-220 shaqyrymy aralyǵynda, ıaǵnı Móńke bı aýylynan Qaıdaýyl kentine deıin kóliktiń barlyq túrine jol qozǵalysy shekteldi.
