Qazaqstannyń 3 qalasynda esirtki taratýmen aınalysqan er adam Abaı oblysynda ustaldy
Oblystyq polıtsııa departamenti baspasóz qyzmetiniń málimetine súıensek, Semeı qalasy PB esirtki qylmysyna qarsy is-qımyl bóliminiń qyzmetkerleri Ulttyq ulan arnaıy bólimshesimen birlese áreket etken.
Pavlodar qalasynyń 31 jastaǵy turǵyny Semeıge kireberis jerdegi «Ertis» beketinde ustaldy. Belgili bolǵandaı, ol Ekibastuz, Aqsý jáne Semeı qalalaryna psıhotroptyq zattardy jetkizip kelgen.
Kúdiktiniń kóligine tintý júrgizý kezinde aldyńǵy tartpanyń astyndaǵy jasyryn qýystan 67 termoqaptama tabyldy. Onyń ishinde untaq zat salynǵan polımerli paketter boldy. Saraptama kórsetkendeı, bul zat jalpy salmaǵy 31,36 gramm bolatyn «A-PVP» psıhotroptyq zatynyń analogi bolyp shyqty.
«Atalǵan fakti boıynsha QR QK-niń 297-baby 3-bóligine (esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý) sáıkes sotqa deıingi tergeý amaldary júrgizilip jatyr. Kúdikti Semeı qalasynyń ýaqytsha ustaý ızolıatoryna qamaldy. Ol 15 jylǵa deıingi merzimge bas bostandyǵynan aırylýy múmkin», - deıdi Semeı qalalyq PB bastyǵy Qaırat Ábdiǵalıev.
