Qazaqstannyń 276 eldi mekenin sý basý qaýpi bar - QR TJM
NUR-SULTAN. QazAqparat - Aýa raıynyń jaǵdaıyna baılanysty Batys Qazaqstan, Almaty, Atyraý, Qostanaı, Aqmola, Qyzylorda, Shyǵys Qazaqstan, Aqtóbe, Soltústik Qazaqstan jáne Túrkistan oblystarynyń 276 eldi mekenin sý basý qaýpi joǵary, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, atalǵan aımaqtarda 270 myńnan astam adam turady.
«Qazgıdromet» bergen málimetter boıynsha ylǵal qorynyń kólemi Aqmola oblysyndaǵy Shaǵalaly ózeni basseıninde normadan 105%-ǵa, Soltústik Qazaqstan oblysyndaǵy Esil ózeni basseıninde 98% - ǵa (Sergeev sý qoımasyna aǵysy), Aqtóbe oblysyndaǵy Elek ózeni basseıninde 97% - ǵa (Aqtóbe sý qoımasyna aǵysy), Qaraǵandy oblysyndaǵy Nura ózeni basseıninde 37% - ǵa (Samarqand sý qoımasyna aǵysy), Qaraǵandy oblysyndaǵy Sarysý ózeni basseıninde 31% - ǵa, Qostanaı oblysyndaǵy Toǵyzaq ózeni basseıninde 20% - ǵa, Qostanaı oblysyndaǵy Aıat ózeni basseıninde 18% - ǵa (Karatomar sýqoımasyna aǵysy), Batys Qazaqstan oblysyndaǵy Ýtva ózeni basseıninde 12% - ǵa, Qostanaı oblysyndaǵy Tobyl ózeni (Joǵarǵy Tobyl sý qoımasyna aǵysy), Aqmola oblysyndaǵy Sileti ózeni basseınderinde 8% - ǵa (Sileti sý qoımasyna aǵysy) joǵary.
Topyraqtyń qatý tereńdigi Batys Qazaqstan (+53 sm), Soltústik qazaqstan (+70 sm), Qaraǵandy (+32-den +66 sm), Aqmola (+23-ten +84 sm), Qostanaı (+19-dan +97 sm), Aqtóbe (+74-ten +92 sm) oblystarynyń ótken jylǵy kórsetkishterinen artyq.
Qar erý protsesi jalǵasýda. Elimizdiń 69% aýmaǵyn qar basyp jatyr: Atyraý oblysynda – 20%, Qyzylorda oblysynda – 29%, Túrkistan oblysynda – 37%, Almaty oblysynda – 52% quraıdy. Jambyl – 74%.
Qyzylorda oblysyndaǵy Syrdarııa ózenderinde jáne Almaty oblysyndaǵy Іle ózeniniń saǵasynda, Shyǵys Qazaqstan oblysyndaǵy Ertis ózeninde, Atyraý oblysyndaǵy Jaıyq ózeninde muz qatýdyń álsireý protsesi júrip jatyr, bul sý keptelisine ákelýi múmkin.
«Sonymen qatar, táýlik ishinde jaýyn-shashynnyń aılyq normasy túsýi múmkin, bul sý tasqyny qubylystaryna ákelýi múmkin ekenin atap ótken jón. Bul rette, jaǵdaıdy topyraqtyń tereń qatýy jáne kúzgi batpaqtaný, qar qory normalarynyń asyp ketýi, sondaı-aq aýa temperatýrasynyń kúrt kóktemgi kóterilýi qıyndatýy múmkin»,-delingen habarlamada.
