Qazaqstannyń 21 jasqa deıingi jastar quramasy Astanadaǵy oqý-jattyǵý jıynyn bastady
ALMATY. 22 shilde. QazAqparat - Búgin Astanada Sergeı Borovskıı jattyqtyratyn Qazaqstannnyń 21 jasqa deıingi jastar quramasy qysqa oqý-jattyǵý jıynyn bastady. Ol 25 shildege deıin sozylmaq. Bul qazaqstandyqtardyń 2015 jylǵy Eýropa chempıonatynyń irikteý dodasyndaǵy 11 tamyz kúni Astanada Armenııamen ótetin matchyna daıyndyq bolmaq. Buǵan deıin olar syrt alańda, Borısov qalasynda Belarýs quramasynan 0:1 esebimen basym túsken bolatyn.
Qazir 2 oıynda da qarsylastarynan basym túsken ıslandııalyqtar 6 upaımen kósh bastap kele jatsa, olardan 1 oıyny kem qazaqstandyqtar 3 upaımen ekinshi orynda tur. Al 1 oıyn ótkizip jeńilis tapqan armıandar men 2 oıynda da jeńilistiń aşy dámin tatqan belorýstardyń jáne áli birde-bir oıyn ótkizbegen frantsýzdardyń qorjyny bos tur.
Eýropa chempıonatynda pleı-off kezeńine shyǵýdy aldyna maqsat etip qoıyp otyrǵan qazaqstandyq aıaqdopshylar budan keıin qatarynan 2 oıynyn syrt alańda ótkizedi. Onyń alǵashqysyn 5 qyrkúıekte frantsııalyqtarmen, ekinshisin 10 qyrkúıekte ıslandııalyqtarmen kezdesedi. Sosyn óz alańynda 10 qazanda Belarýs, al qazanda syrt alańda Armenııa fýtbolshylarymen qarymta kezdesý ótkizedi. Al aqyrǵy 2 oıynyn 2014 jyly óz alańynda ótkizbek. Onyń alǵashqysyn 5 naýryzda Islandııa, ekinshisin 2 qyrkúıekte Frantsııa fýtbolshylarymen ótkizetin bolady.
