Qazaqstannyń 2025 jylǵa deıingi strategııalyq damý josparynyń kartasy ázirlendi
«2025 jylǵa deıingi strategııalyq damý josparynyń túıindi ulttyq ındıkatorlaryna qol jetkizý maqsatynda biz strategııalyq kartany ázirledik. Strategııalyq kartada túıindi ulttyq ındıkatorlar salalar jáne óńirler boıynsha jyl saıynǵy mánderdi kórsete otyryp bólingen. Túıindi ulttyq ındıkatorlardy bólgende olardyń nátıjelerine qol jetkizýge jaýapty ár ortalyq memlekettik organnyń jáne jergilikti atqarýshy organnyń úlesi anyqtaldy»,- dedi Tımýr Súleımenov.
Mınıstrdiń atap ótýinshe, salalar jáne óńirler boıynsha «eńbek ónimdiliginiń ósýi», «negizgi kapıtalǵa ınvestıtsııa jumsaý» «baqylanbaıtyn ekonomıka úlesi» syndy úsh keshendi ındıkator bólindi. 16 ındıkator óńirler bólinisinde kórsetildi. 18 ındıkator boıynsha salalar jáne óńirlerge bólinbesten memlekettik organdardyń tikeleı mindetteri aıqyndaldy. Indıkatorlardyń boljamdary resmı statıstıkalyq, vedomstvolyq jáne halyqaralyq málimet kózderinen alynyp, qabyldanǵan statıstıkalyq jáne matematıkalyq ádistemeler negizinde eseptelindi, sondaı-aq, óńirlerdiń erekshelikteri nazarǵa alyndy.
«Osylaısha, Strategııalyq kartanyń barlyq ındıkatorlary boıynsha túrli saladaǵy jaǵdaıdy jaqsartýǵa baǵyttalǵan ońdy ósim dınamıkasy baıqalady. Jalpy, qabyldanǵan Strategııalyq karta Strategııalyq jospardyń ındıkatorlaryna qol jetkizýdi qadaǵalaýǵa jáne josparly mánderden aýytqyǵan jaǵdaıda tıisti sharalar qoldanýǵa múmkindik beredi. Túıindi ulttyq ındıkatorlarǵa qol jetkizýdi qamtamasyz etý úshin Strategııalyq kartanyń josparly mánderi tek Strategııalyq josparǵa ózgerister men tolyqtyrýlar engizilgen jaǵdaıda túzetiletin bolady», - dedi ol.
Onyń aıtýynsha, munan arǵy jumys memlekettik josparlaý júıesiniń tómengi deńgeıdegi qujattaryn Strategııalyq kartaǵa sáıkes keltirýge baǵyttalatyn bolady. Strategııalyq kartanyń ındıkatorlaryn iske asyrý jáne olarǵa qol jetkizý barysyn monıtorıngileý jylyna 1 ret Strategııalyq damý josparyn monıtorıngileý aıasynda júzege asyrylady.
