Qazaqstannyń 2021 jylǵy JEEK tóraǵalyǵy: Toqaev jumys josparyn jarııa etti

NUR-SULTAN. QazAqparat – 2021 jyly Joǵary Eýrazııalyq ekonomıkalyq keńestiń tóraǵalyǵy Belarýsten Qazaqstanǵa ótedi. Keńestiń búgingi otyrysynda QR Prezıdenti Qasym-Jomart Toqaev Qazaqstan bul maqsatta qandaı jumysqa mán beretinin málim etti, dep habarlaıdy QazAqparat tilshisi.

«Eýrazııalyq ekonomıkalyq odaqtyń jarǵylyq organdaryndaǵy tóraǵalyq jańa jyldan bastap Belarýsten Qazaqstanǵa ótedi. Kelesi jyly basty basymdyqty ekonomıkalyq odaq týraly kelisimdi tolyqqandy oryndaýǵa, kedergilerdi joıýǵa, ózara tıimdi kooperatsııalyq jáne halyqaralyq yntymaqtastyqty damytýǵa, komıssııanyń kadrlyq quramyn qalyptastyrý protsedýrasyn jetildirýge, onyń fýnktsıonaldyǵyn nyǵaıtýǵa bergeli otyrmyz. Qurmetti áriptester, meniń resmı usynystarym kelesi jyldyń qańtar aıynda sizderge joldanady», - dedi Qasym-Jomart Toqaev Joǵary Eýrazııalyq ekonomıkalyq keńestiń otyrysynda.

Qazaqstan Prezıdenti EAEO aıasyndaǵy yntymaqtastyq – ekonomıkalyq odaqqa múshe memleketterdiń basymdyqqa ıe baǵyty bolyp qala beretinin jetkizdi.

«Alda bizdi taǵy bir kúrdeli jyl kútip tur. Kúsh biriktirý arqyly eýrazııalyq ıntegratsııanyń jańa ári sapaly deńgeıine shyǵarmyz degen úmittemin», - dedi Prezıdent.