Qazaqstannyń 2010-2020 jyldarǵa arnalǵan quqyqtyq saıasat tujyrymdamasy alǵash ret shet memlekette talqylanýda
ASTANA. Jeltoqsannyń 7-si. QazAqparat /Aıdar Ospanalıev/ - Búgin Berlınde «Qazaqstan Respýblıkasynyń 2010-2020 jyldarǵa arnalǵan quqyqtyq saıasat tujyrymdamasy: quqyqtyq jáne sot reformasy salasyndaǵy turaqty damý» atty taqyrypta halyqaralyq konferentsııa ótip jatyr,
dep habarlaıdy QazAqparat.
Qazaqstandyq delegatsııa onda sot júıesin reformalaý, azamattyq jáne ákimshilik zańnamalardy jetildirý jáne osy sharany uıymdastyryp otyrǵan nemistiń tehnıkalyq yntymaqtastyq jónindegi qoǵamdastyǵymen baılanysty jetildirý máselelerin talqylaýǵa atsalysýda. Sharanyń mańyzdylyǵy qazaqstandyq baǵdarlamalyq qujat alǵash ret shet memlekette talqylanýda.
Konferentsııanyń ashylý rásiminde elimizdiń Konstıtýtsııalyq Keńesiniń tóraǵasy Igor Rogov pen Qazaqstannyń Germanııadaǵy elshisi Nurlan Ońjanovtar kirispe sóz sóıledi. Al Joǵarǵy sot tóraǵasy Musabek Álimbekov búgingi jıynnyń Qazaqstannyń Joǵarǵy sotynyń Nemistiń tehnıkalyq yntamaqtastyq jónindegi qoǵamdastyǵymen birlesken qımyldarynyń jemisti nátıjesi ekendigin atap kórsetti. Sondaı-aq ol germanııalyq áriptesterine qazaqstandyq sot júıesin jetildirýge úles qosqany úshin alǵysyn bildirdi.
Konferentsııa jumysy 5 sessııa boıynsha júrip jatyr. Birinshi sessııa barysynda Qazaqstandaǵy quqyqtyq jáne sot júıesine qatysty jalpy máseleler talqylandy. Konstıtýtsııalyq Keńes tóraǵasy Igor Rogov bul máselege qatysty óziniń baıandamasynda elimizdiń Quqyqtyq saıasaty tujyrymdamasynyń basym baǵyttaryna toqtaldy. Al Parlament Senatynyń Zańnama jáne quqyqtyq máseleler komıtetiniń tóraǵasy Berik Imashev Qazaqstandaǵy quqyq qorǵaý organdary júıesin jetildirýge qatysty baıandama jasady. Sondaı-aq tujyrymdamadaǵy prokýrorlyq baqylaý sharasynyń bolashaǵy jóninde Bas prokýrordyń birinshi orynbasary Iogan Merkel baıandady.
