Qazaqstannyń 200 ustazy «Joǵary oqý ornynyń úzdik oqytýshysy» ataǵyna ıe boldy

Búgin Astanadaǵy Qazaq ulttyq óner ýnıversıtetinde ataq ıegerlerin saltanatty marapattaý rásimi ótti.

Onyń 51% - ǵylym doktorlary, 37,5% - professorlar, qalǵandary - ǵylym kandıdattary, qaýymdastyrylǵan professorlar, dotsentter.

Konkýrs joǵary oqý oryndarynyń 70 paıyzyn qamtydy. Eki kezeńnen turǵan baıqaýǵa 97 joǵary oqý ornynan 500-den astam ótinim tústi. Onyń 49-y memlekettik jáne 48-i jekemenshik. Ekinshi kezeńde elektrondyq aıqyndaý barysynda ustazdyq qyzmetiniń úzdik nátıjelerin kórsetken 200 úmitker tańdap alyndy. Konkýrs jeńimpazdarynyń 50 paıyzy ǵylymnyń kókeıkesti: fızıka-matematıka, bıologııa, medıtsına, hımııa ǵylymdary salalarynan. Al 31 adam pedagogıkalyq ǵylym salasynan.

«Bul jerde elimizdiń eń úzdik oqytýshylary jınalǵan. Men buǵan shyn júrekpen qýanyshtymyn. Zaldaǵylardyń 80 paıyzyn men óte jaqsy tanımyn, olar ózderiniń qajyrly eńbekterimen, bolashaq jastardyń qolynda ekendigin dáleldep júrgen meniń keshegi áriptesterim. El Prezıdenti Nursultan Nazarbaevtyń Joldaýy dál osy jastarǵa baǵyttalǵan jáne Memleket basshysy olardyń tárbıesine jete nazar aýdarýda», - dedi QR Bilim jáne ǵylym mınıstri Baqytjan Jumaǵulov óziniń quttyqtaýynda.

Mınıstr marapattaý barysynda, jeńimpazdarǵa granttar tabys etti. Bul grant joǵary oqý ornynyń oqytýshylaryna álemniń Ulybrıtanııa, Germanııa, Frantsııa, Italııa, Ispanııa, Belgııa, Polsha, Chehııa, Vengrııa, Shvetsııa, Avstrııa, Bolgarııa, Lıtva, Latvııa, Reseı jáne basqa da elderdiń úzdik joǵary oqý oryndarynda tájirıbeden ótýge múmkindik bermek. Budan basqa grant ıegerleri bir jyl ishinde halyqaralyq, respýblıkalyq ǵylymı konferentsııalardyń, sımpozıýmdardyń, kongresterdiń, ǵylymı zertteý taqyryby jáne oqý protsesin uıymdastyrý máseleleri boıynsha semınarlardyń jumystaryna qatysa alady.