Qazaqstannyń 20 tóreshisi IAAF-nyń arnaıy sertıfıkatyna ıe bolady
ASTANA. QazAqparat - Jeńil atletıkadan Qazaqstannyń 20 tóreshisi Halyqaralyq jeńil atletıka federatsııalary qaýymdastyǵynyń (IAAF) arnaıy sertıfıkatyna ıe bolady, dep habarlaıdy QazAqparat QR Jeńilatletıka federatsııasynyń resmı saıtyna silteme jasap.
Buǵan deıin habarlaǵanymyzdaı , 25-27 jeltoqsan kúnderi aralyǵynda Almaty qalasynda halyqaralyq jeńil atletıka federatsııalary qaýymdastyǵynyń (IAAF) baǵdarlamasy boıynsha tóreshilerdiń biliktiligin arttyrýǵa arnalǵan oqý kýrsy ótken bolatyn.
Atalǵan oqý kýrsyna Qazaqstannyń ár aımaǵynan úzdik 20 tóreshi tańdalyp alǵan. Olar - Shyǵys Qazaqstan, Soltústik Qazaqstan, Qaraǵandy, Mańǵystaý, Ońtústik Qazaqstan oblystary men Almaty qalasynan kelgender. Qazylardyń basym bóligi «Joǵary dárejeli ulttyq tóreshiler».
Qazaqstandyq jeńil atletıka arbıtrlaryna dáris oqýǵa Azııanyń eń úzdik tóreshileriniń biri - Vadım Nıgmatov kelgen. Tájikstandyq mamannyń jastyǵyna qaramastan iri halyqaralyq dodalardaǵy tájirıbesi mol. Ol Azııa oıyndary men Azııa chempıonatynda, búkilálemdik Ýnıversıada, Olımpıada oıyndary, «Gaýhar lıgada» tórelik etken. 33 jastaǵy Nıgmatov 2006 jyly halyqaralyq dárejedegi tóreshi atandy. Sóıtip, jeńil atletıkadaǵy álemniń eń jas tóreshisi atandy.
QR Jeńil atletıka federatsııasy ǵylymı-tehnıkalyq ortalyǵynyń jetekshisi Aleksandr Krýglıkovtyń aıtýynsha, kýrstyń maqsaty aldaǵy ýaqytta elimizde halyqaralyq dodalarda tóreshilik etetin joǵary deńgeıli arbıtrlardyń sanyn kóbeıtý.
