Qazaqstannyń 20 myń teńgelik jańa banknoty laıyqty baǵasyn aldy
ALMATY. QazAqparat- Halyqaralyq óńirlik banknottar baıqaýynda 20 myń teńgelik qazaqstandyq banknot dızaın jáne qorǵaý tehnologııasy boıynsha úzdik dep tanyldy.
Bul týraly búgin QR Ulttyq bankiniń baspasóz qyzmetinen habarlady.
Marapattaý rásimi ústimizdegi jyly 15 naýryzda Rýmynııanyń astanasy Býharest qalasynda Joǵaryqorǵandy mór boıynsha Eýropalyq Konferentsııa (High Security Printing Europe) barysynda ótkizilgen.
«Úzdik banknot» júldesi dızaın salasyndaǵy úzdik jetistik, banknot nemese banknottar serııasynyń qorǵanys deńgeıiniń joǵary tehnologııalyq sıpattylyǵy úshin beriledi. Sondaı-aq, aqsha belgisiniń sol elge tıistiligine, ıaǵnı eldiń mádenı murasyna, beınelemesine erekshe kóńil bólinedi.
20 myń teńgelik banknottyń bet jaǵynda negizgi beıneler «Qazaq Eli» monýmenti, pyraq jáne Máńgilik el saltanatty arkasy beınelengen. Qazaqstannyń táýelsizdigin beıneleıtin «Qazaq Eli» tarıhı-memorıaldyq kesheni Astana qalasynyń on jyldyq mereıtoıy qarsańynda ashyldy. Stela bıiktigi - 91 metr - Qazaqstannyń táýelsizdik alǵan 1991 jyldy bildiredi. Eskertkishtiń mármár tuǵyry Qazaqstan halqynyń taza oı-nıeti men etnıkaaralyq úılesimin pash etedi. Al tóbesinde Samuryq qus bar stelanyń ózi Qazaqstan halqynyń bolashaqqa, odan ári damý men gúldenýge degen umtylysyn kórsetedi. Banknottyń joǵary sol jaǵynda pyraq beınelengen, ol túrkitildes jáne kóshpendi halyqtardy qosa alǵanda kóptegen mádenıette taza nur men ómirdiń, shabyt pen jemisti eńbektiń, maqsatqa umtylýshylyq pen bıliktiń nyshany retinde qabyldanady. Banknottyń tómengi jaǵynda ortada Máńgilik el saltanatty arkasy - erkin eldiń máńgilik ıdeıasy, jalpyǵa ortaq Qazaqstan úıiniń ulttyq ıdeıasy sáýlet qurylysy turǵysynan beınelengen. Syrt jaǵynda banknottyń ortasyndaǵy negizgi beıne Qazaqstan kartasynyń pishini jáne elordamyz - Astana qalasynyń Qazaqstan Respýblıkasynyń Konstıtýtsııasynda negizi qalanǵan bılik tarmaqtaryn bólý qaǵıdatyn kórsetetin tártippen ornalasqan Aqorda, Parlament jáne Úkimet ǵımarattary bar kórinisi beınelengen. Jańa banknot Qazaqstan teńgesiniń eń qorǵalǵan aqsha belgisi, sondaı-aq álemdegi eń qorǵalǵan banknottardyń biri bolyp tabylady.
Qorǵaý úshin qoldan jasaýdan qorǵaý ındýstrııasyndaǵy sońǵy ınnovatsııalar, jalǵan aqsha jasaýshylarǵa qarsy is-qımyldyń jańartylǵan ári kúsheıtilgen klassıkalyq tásilderi paıdalanyldy. Bet jaǵyndaǵy negizgi qorǵanysh elementter: banknottyń eki jaǵynan jaryqqa tosyp qaraǵanda kórinetin samuryq mıftik qusy túrindegi kompozıttik jetildirilgen sýtamǵy belgisi jáne móldir oryn túrindegi qus pishini. Dızaınynyń túpnusqalylyǵyn tekserýdi jeńildetetin tús aýystyrý elementteri pyraq, móldir orynda kórinetin qazaqtyń oıý-órnegi jáne tús aýystyratyn qorǵanysh úzik-úzik jip túrinde ornalasqan. Kózi nashar kóretin adamdar úshin banknottyń oń jaǵynda shetinde saýsaqpen ajyratýǵa bolatyn jeti joǵary bederli úsh burysh basylǵan.
