Qazaqstannyń 2 oblysynda halyq sanaǵy jańa ádispen ótti

NUR-SULTAN. QazAqparat - Býrabaı jáne Aıagóz aýdandarynda qanatqaqty rejımde halyq sanaǵy júrgizildi. Bul týraly Parlament Májilisinde memlekettik statıstıka taqyrybyna arnalǵan dóńgelek ústel otyrysynda QR UEM Statıstıka komıtetiniń tóraǵasy Nurbolat Aıdapkelov málim etti, dep habarlaıdy QazAqparat tilshisi.

«Aqmola oblysynyń Býrabaı aýdany men Shyǵys Qazaqstan oblysynyń Aıagóz aýdanynda pılottyq rejımde halyq sanaǵy júrgizildi. Bul sanaq kezinde onlaın tártipte ınternet jelisin paıdalaný jáne planshet arqyly saýalnama júrgizý ádisi iske qosyldy», - dedi N. Aıdapkelov.

Osy qanatqaqty tártipte ótken sanaq qorytyndysy boıynsha taldaý esebi daıyndalyp, QR Premer-Mınıstriniń Keńsesine jiberildi. Bul turǵyda halyqtyń sany, nekelik jaǵdaı, bilim men jumyspen qamtylý deńgeıi, kóshi-qon boıynsha keste jasaldy.

Aıta keteıik, jalpyulttyq halyq sanaǵy 2020 jyly ótkiziledi.Osy jumystardy júrgizýge shamamen 9 mlrd teńge jumsalýy yqtımal.

Jańa ádis boıynsha sanaq kezinde qaǵaz jumystaryna shekteý qoıylady. Málimetterdi qaǵazǵa túsirý tolyqtaı toqtatylmaq, ıaǵnı barlyǵy planshettermen júrgiziledi.

Belgili bolǵandaı, halyq sanaǵyna 30 myńǵa tarta ıntervıýer jumyldyrylady.